سوزاق اۋدانىنداعى ى.التىنسارين اتىنداعى جالپى ءبىلىم بەرەتىن مەكتەپتىڭ ەسكى عيماراتى 1961 جىلى سالىنىپ, 1962 جىلدان بەرى پايدالانىلىپ كەلگەن بولاتىن. ۋاقىت وتە كەلە عيمارات اپاتتى دەپ تانىلىپ, ونىڭ ورنىنا مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان «كەلەشەك مەكتەپتەرى» جوباسى اياسىندا جاڭا, زاماناۋي وقۋ ورداسى سالىندى, دەپ جازادى Egemen.kz.
جاڭا «كەلەشەك مەكتەپ» عيماراتى 900 وقۋشىعا ارنالعان. قازىرگى تاڭدا مۇندا 1300-دەن استام بالا ەكى اۋىسىمدا ءبىلىم الۋدا. مەكتەپتىڭ باستى ەرەكشەلىگى – ءبىلىم بەرۋ ۇدەرىسىنە بارىنشا قولايلى جاعداي جاسالعانى. كەڭ ءارى جارىق سىنىپ بولمەلەرى, زاماناۋي جيھازدار مەن وقىتۋ قۇرالدارى, قاۋىپسىزدىك جۇيەسى جانە ينكليۋزيۆتى ورتاعا بەيىمدەلگەن ينفراقۇرىلىم – ءبارى دە وقۋشىلاردىڭ ساپالى ءبىلىم الۋىنا باعىتتالعان.
ءبىلىم ورداسىندا 64 وقۋ كابينەتى, سپورت زالى, اكت زالى جانە اسحانا تولىق جابدىقتالعان. مەكتەپتىڭ ماتەريالدىق-تەحنيكالىق بازاسى جاڭا دەڭگەيگە كوتەرىلدى. ىشىندە ينتەرنەتكە قوسىلعان 5 ارنايى كومپيۋتەر كابينەتى بار. سونداي-اق وقۋ ۇدەرىسىن تسيفرلاندىرۋ ماقساتىندا 64 ينتەراكتيۆتى تاقتا ورناتىلعان.
بۇگىندە 120-دان استام جوعارى ءبىلىمدى پەداگوگ شاكىرتتەرگە ساپالى ءبىلىم مەن سانالى تاربيە بەرۋدە. ۇجىمدا تاجىريبەلى زەرتتەۋشى, ساراپشى, مودەراتور جانە شەبەر پەداگوگتەر قىزمەت اتقارادى. ولاردىڭ كاسىبي دامۋىنا جانە وقىتۋ ساپاسىن ارتتىرۋعا بارلىق مۇمكىندىك قاراستىرىلعان.
جاڭا «كەلەشەك مەكتەپ» عيماراتىنىڭ اشىلۋى – سوزاق اۋدانىنىڭ ءبىلىم بەرۋ جۇيەسىندەگى ماڭىزدى جاڭارۋ. بۇل جوبا وڭىردەگى بالالارعا زاماناۋي جاعدايدا ءبىلىم الۋعا, ۇستازدارعا قولايلى ەڭبەك ەتۋگە مۇمكىندىك بەرىپ وتىر.