قاراعاندىداعى «سارىارقا» سپورت كەشەنىندە ۇستەل تەننيسىنەن جاسوسپىرىمدەر اراسىنداعى قازاقستان بىرىنشىلىگى ءوز مارەسىنە جەتتى. بىرنەشە كۇن بويى ەلىمىزدىڭ بىرقاتار ايماعىنان جينالعان دارىندى ۇل-قىزدار ءتۇرلى-ءتۇستى مەدالداردى ساراپقا سالدى, دەپ جازادى Egemen.kz.
ۇلداردىڭ جەكەلەگەن سايىسىندا شىمكەنتتىك نۇريسلام قاسىمنىڭ قارقىنىنا ەشكىم شىدامادى. بارلىق قارسىلاسىن سىپىرا ۇتقان ول فينالدا شىعىس قازاقستان وبلىسىنىڭ وكىلى ءالىبي شارمانوۆقا شاڭ قاپتىردى. قولا مەدالدى اسىلحان ماعزۇمبەكوۆ (قاراعاندى) پەن سانجار يباحان (تۇركىستان) يەلەندى. قىزدار اراسىنداعى جارىس جەرىگلىكتى سپورتشى ماريا لۋكيانوۆانىڭ جەڭىسىمەن اياقتالدى. شەشۋشى تۇستا ول تۇركىستاندىق نويلا حانيازوۆانى قاپى قالدىردى. ەكىنشى جانە ءۇشىنشى ورىندى داريا فۋ (قاراعاندى) مەن ايناز ادىلگەرەەۆا (الماتى قالاسى) ەنشىلەدى.
جۇپتىق سىندا نۇريسلام قاسىم مەن سانجار يباحانعا (شىمكەنت/تۇركىستان) تەڭ كەلەر ەشكىم تابىلمادى. باس جۇلدە ءۇشىن تارتىستا ولار باقداۋلەت ساۋىرباي مەن مانسۇر سۇيىندىككە (شىمكەنت/پاۆلودار) سان سوقتىردى. ۇزدىك ۇشتىكتى ءمۇحاممادالى قۇربانتاي/نۇرجىگىت جولدىباي (شىمكەنت / تۇركىستان) جانە الەكسەي ماركين/الىبي شومانوۆ (الماتى قالاسى/شىعىس قازاقستان) جۇبى تۇيىندەدى. بۇرىمدىلاردىڭ باسكەسىنە نويلا حانيازوۆا مەن اقنيەت امانگەلدى (تۇركىستان / شىمكەنت) التىننان القا تاقتى. ودان كەيىنگى ساتىلارعا نۇرسايا نۇرمان/ايناز ادىلگەرەەۆا (شىعىس قازاقستان / الماتى قالاسى), ۆيكتوريا موچالكينا/داريا فۋ (قاراعاندى), رۋانا شىمكەنتباي/گۇلناز بۋلانوۆا (شىمكەنت/پاۆلودار) جايعاستى.
ارالاس جۇپتاردىڭ جارىسىندا اسىلحان ماعزۇمبەكوۆ مەن ماريا لۋكيانوۆانىڭ (قاراعاندى) مەرەيى ۇستەم بولدى. فينالدا ولار كيريلل بەرنيكوۆ پەن مەرۋەرت تاجيموۆانى (الماتى قالاسى/ اقمولا) تىزە بۇكتىردى. ءمۇحاممادالى قۇربانتاي/نۇرسايا نۇرمان (شىمكەنت/شىعىس قازاقستان) مەن سانجار يباحان/اقنيەت امانگەلدى (تۇركىستان/شىمكەنت) جۇلدەگەرلەر قاتارىنا قوسىلدى.
ۇلداردىڭ كوماندالىق سايىسىندا قۇرامىندا نۇريسلام قاسىم, ءمۇحاممادالى قۇربانتاەۆ, باقداۋلەت ساۋىرباي, ەراسىل ەركىنبەك, اسلان تالعات سىندى شەبەرلەرى بار شىمكەنت قالاسىنىڭ ورەندەرى ەشكىمگە دەم بەرمەدى. پاۆلودار مەن شىعىس قازاقستان وبلىستارى ەكىنشى مەن ءۇشىنشى ورىندارعا تابان تىرەدى. قىزداردىڭ باسەكەسىندە قاراعاندىلىق ۇستەل تەننيسشىلەرىنىڭ باعى جاندى. بۇل كوماندانىڭ نامىسىن ۆيكتوريا موچالكينا, داريا فۋ, ماريا لۋكيانوۆا, داريا گاموۆا, ايىم ءامىرزا سەكىلدى دارىندى جاستار قورعادى. كۇمىس مەدالدى شىعىسقازاقستاندىقتار ەنشىلەسە, تۇركىستاندىقتار قولاعا قول سوزدى.