ەلىمىزدە 2024 جىلدان بەرى سۋ ۇنەمدەۋ تەحنولوگيالارىن جانە سۋارۋ جۇيەسىن ەنگىزۋگە ارنالعان سۋبسيديا تۇرىندە مەملەكەتتىك قولداۋ كورسەتۋ بويىنشا اۋقىمدى جۇمىس جۇرگىزىلىپ جاتىر. شارۋالاردىڭ ينفراقۇرىلىم تارتۋ, سۋ ۇنەمدەۋ جۇيەلەرىن ساتىپ الۋ جانە ورناتۋ شىعىندارىن وتەۋ ۇلەسى 50%-دان 80%-عا دەيىن ۇلعايتىلدى. سونداي-اق تاريف قۇنىنا بايلانىستى سۋارمالى سۋعا سۋبسيديانىڭ سارالانعان مولشەرى ەنگىزىلدى, دەپ حابارلايدى Egemen.kz.
قابىلدانعان شارالاردىڭ ناتيجەسىندە سۋ ۇنەمدەۋ تەحنولوگيالارىن قولدانۋ اۋماعى 86%-عا ۇلعايىپ وتىر. ناقتىراق ايتقاندا, 2023 جىلعى 312,2 مىڭ گەكتاردان بيىل شامامەن 581 مىڭ گەكتارعا جەتكەن.
مەملەكەتتىك قولداۋ سۋ ۇنەمدەۋ تەحنولوگيالارىن شىعارۋ نارىعىنىڭ دامۋىنا دا ىقپال ەتتى. 2024 جىلى تۇركىستان وبلىسىندا جانە الماتى, استانا قالالارىندا جاڭبىرلاتىپ جانە تامشىلاتىپ سۋارۋ جابدىقتارىن جاساپ شىعاراتىن ءتورت وتاندىق زاۋىت اشىلعان.
بيىل جامبىل وبلىسىندا تامشىلاتىپ سۋارۋ جۇيەلەرىن شىعاراتىن قازاق-قىتاي بىرلەسكەن جوباسى ىسكە قوسىلدى. كاسىپورىننىڭ وندىرىستىك قۋاتى 14 مىڭ گەكتار القاپتى تامشىلاتىپ سۋارۋ لەنتالارىمەن قامتۋعا مۇمكىندىك بەردى.
سونداي-اق سۋ رەسۋرستارى جانە يرريگاتسيا مينيسترلىگىنىڭ مالىمەتىنشە تۇركىستان قالاسىنىڭ يندۋستريالىق ايماعىندا تامشىلاتىپ سۋارۋ جۇيەسىنە ارنالعان پلاستيك قۇبىر ءوندىرىسى ىسكە قوسىلدى. جەتىساي اۋدانىنىڭ يندۋستريالىق ايماعىندا پوليەتيلەندى قايتا وڭدەۋ جانە سۋ ۇنەمدەۋ جابدىقتارىن ءوندىرۋدى ىسكە قوسۋ جۇمىستارى ءجۇرىپ جاتىر. ال ماقتاارال اۋدانىنىڭ يندۋستريالىق ايماعىندا جىل سوڭىنا دەيىن پلاستيك قۇبىرلار, لەنتالار جانە تامشىلاتىپ سۋارۋ قۇرىلعىلارىن شىعاراتىن ءوندىرىس ىسكە قوسىلماق.
قىزىلوردا وبلىسىندا تۇرىك ينۆەستورلارى جوبالىق قۋاتى 20 مىڭ گەكتار بولاتىن تامشىلاتىپ سۋارۋ جۇيەلەرىن جاسايتىن زاۋىتتى ىسكە قوسۋدى جوسپارلاپ وتىر.
«مەملەكەت باسشىسىنىڭ تاپسىرماسىنا سايكەس, ءبىز ەلىمىزدىڭ سۋ سالاسىنا ينۆەستيتسيا تارتۋ جۇمىسىن بەلسەندى جۇرگىزىپ جاتىرمىز. حالىقارالىق ارىپتەستەرمەن ىنتىماقتاستىق زاماناۋي تەحنولوگيالار مەن ينۆەستيتسيالارعا جول اشادى, بىراق بارلىق ستراتەگيالىق شەشىم تەك قازاقستاندا قابىلدانادى. سۋ رەسۋرستارى بۇرىن دا, قازىر دە تىكەلەي مەملەكەت باقىلاۋىندا جانە سولاي قالا بەرەدى دە. اسىرەسە ماڭىزدى سۋ نىساندارىن شەت مەملەكەتتەردىڭ قولدانىسىنا بەرۋ ماسەلەسى ەشقاشان قارالعان ەمەس. ءبىزدىڭ باستى ماقساتىمىز – ازاماتتارىمىزدىڭ مۇددەلەرىن قورعاۋ ءۇشىن سۋ شارۋاشىلىعىن جاڭارتىپ, جەتىلدىرۋ جانە ۇلتتىق قاۋىپسىزدىكتى قامتاماسىز ەتۋ. سۋ – وتە ماڭىزدى ستراتەگيالىق رەسۋرس. ءبىز ءار تامشىسىن ءتيىمدى پايدالانىپ, ۇنەمدەۋ باعىتىندا جۇمىس ىستەپ جاتىرمىز. بۇل – ەلىمىزدىڭ بولاشاعى ءۇشىن اسا ماڭىزدى», دەدى سالا ءمينيسترى نۇرجان نۇرجىگىتوۆ.