ەلوردادا ەرەكشە بالالار سايىستى

وسىمەن ءۇشىنشى مارتە ۇيىمداستىرىلعان سايىس ءۇش كۇنگە ۇلاسىپ, 10 سپورت تۇرىنەن 167 بالا قاتىستى. ءار ايماقتان كەلگەن بالالار اسىق اتۋ, توعىزقۇمالاق, بەستەمشە سياقتى ۇلتتىق ويىن تۇرلەرىنەن سايىسقا ءتۇستى.  ءجۇزۋ,  شاعىن فۋتبول, ۇستەل تەننيسى, جەڭىل اتلەتيكا, شاحمات, بوۋلينگ جانە نىسانا كوزدەۋدەن دە شەبەرلىكتەرىن كورسەتتى.

ءىس-شارانى   «فەنيكس» قوعامدىق قورى مەن UMC كورپوراتيۆتىك قورى تىزە قوسىپ ۇيىمداستىردى. وقۋ-اعارتۋ مينيسترلىگى مەن KAZ Minerals Management كومپانياسى باس سەرىكتەس بولعان قايسار بالالاردىڭ ويىندارىنا دەنساۋلىق ساقتاۋ مينيسترلىگى, تۋرزيم جانە سپورت مينيسترلىگى, استانا قالاسىنىڭ دەنەشىنىقتىرۋ جانە سپورت باسقارماسى, قر ۇلتتىق ۇلاننىڭ باسشىلارى دا قولداۋ كورسەتتى.  سپورتتىق سايىستار ءال-فارابي اتىنداعى وقۋشىلار سارايىندا, «الاۋ» مۇز ايدىنىندا جانە «Pingwin» بوۋلينگ ورتالىعىندا ءوتتى. جۇلدەگەر اتانعان قاتىسۋشىلارعا Qaisar Games مەدالدارى مەن گراموتالارى تابىستالدى. سپورتتىق جارىستاردان سىرت بالاقايلار  Ailand وتباسىلىق دەمالىس ورتالىعىندا شەبەرلىك ساعاتتارىنا قاتىستى. سايىس بارىسىندا ەرەكشە بالالاردىڭ اتا-انالارى دا ۋاقىتىن ءتيىمدى وتكىزدى. اكتەرلىك شەبەرلىك, بي ونەرى ماماندارىنىڭ شەبەرلىك ساباعىنا قاتىسىپ, پسيحولوگيالىق دارىستەردى تىڭدادى. يگى شارانىڭ سالتاناتتى جابىلۋ راسىمىندە ءسوز العان دارىگەرلەر قاتەرلى اۋرۋلاردى جەڭگەن بالالاردىڭ قايسارلىعىن ءاردايىم ۇلگى تۇتۋ ماڭىزدى ەكەنىن اتاپ ءوتتى.

Qaisar Games سپورتتىق ويىندارىنىڭ باستى ماقساتى – ونكولوگيالىق اۋرۋلاردى, سۇيەك كەمىگى سىندى كۇردەلى  سىرقاتتى جەڭگەن,  اعزا ترانسپلانتاتسياسى جاسالعان جەتكىنشەكتەردى  وڭالتۋ ماسەلەسىنە قوعام نازارىن اۋدارۋ. بالاقايلاردىڭ دا قاتارىنان قالماي  بەلسەندى ومىرگە بەيىمدەلۋىنە قولداۋ كورسەتۋ.

وكىنىشكە قاراي, ەلىمىزدە جىل سايىن 600–640 بالادان ونكولوگيالىق اۋرۋدىڭ بەلگىلەرى انىقتالادى. قازىرگى تاڭدا 5 000-نان استام بالا تۇراقتى باقىلاۋدا تۇر. مەديتسينا عىلىمىنىڭ جەتىستىكتەرى مەن وتاندىق دارىگەرلەردىڭ كاسىبي بىلىكتىلىگىنىڭ ناتيجەسىندە  ونكولوگيالىق اۋرۋعا تاپ بولعان بالالاردىڭ دەنساۋلىعى دا جاقسارىپ. دەسە دە دارىگەرلەر مەديتسينا سالاسىنىڭ جەتىستىگىنەن كەيىن سىرقاتىنان ايىققاننان كەيىن  بالالار قوعامدا وقشاۋلانىپ قالاتىنىن العا تارتادى. ەمدەلۋدەن كەيىن  بالالار مەن ولاردىڭ اتا-انالارىنا جۇيەلى قولداۋ كورسەتۋ ماڭىزدى. الەۋمەتتەن وقشاۋلانىپ, پسيحولوگيالىق كۇيزەلىسكە ۇشىراعان جاندار ءاردايىم دەمەۋگە ءزارۋ.  QAISAR GAMES – بۇل جاي عانا مەدال ءۇشىن جارىس ەمەس. شارانىڭ باستى ميسسياسى – ەمدەۋدەن كەيىنگى وڭالتۋ شارالارىن كۇشەيتۋ دەيدى ۇيىمداستىرۋشىلار. سايىسقا قاتىسقان بالالار پسيحولوگيالىق, فيزيكالىق جانە الەۋمەتتىك تۇرعىدان قولداۋ كورىپ, شاتتىققا كەنەلدى.  يگى شارا الداعى ۋاقىتتا دا جالعاسىن تاپپاق.