شىمكەنت حالىقارالىق اۋەجايى RA3 (Regulated Agent Third Country) مارتەبەسىن الدى. اۋەجاي جۇك تاسىمالداۋ سالاسىندا ەۋروپالىق وداقتىڭ قاتاڭ اۆياتسيالىق قاۋىپسىزدىك تالاپتارىنا تولىق سايكەس كەلەدى, دەپ حابارلايدى Egemen.kz.
وسىدان باستاپ اۋەجاي رەسمي تۇردە ەۋروپانىڭ RA3 دەرەكتەر بازاسىنا تىركەلدى. جاڭا مارتەبە ەۋروپا ەلدەرىنە قوسىمشا تەكسەرۋسىز تىكەلەي جۇك تاسىمالداۋدى جۇزەگە اسىرۋعا جول اشتى.
سونىڭ ناتيجەسىندە جۇك جەتكىزۋ ۋاقىتى جەدەلدەپ, لوگيستيكالىق تىزبەكتەر جەڭىلدەيدى. سەرىكتەستەردىڭ ۋاقىتتىق جانە قارجىلىق شىعىندارى ازايادى. ودان بولەك قالانىڭ حالىقارالىق اۋە تاسىمالداۋشىلار مەن لوگيستيكالىق كومپانيالار ءۇشىن تارتىمدىلىعى ارتا تۇسەدى.
شىمكەنت ءۇشىن بۇل وقيعانىڭ ستراتەگيالىق ماڭىزى زور. جاڭا مارتەبە اۋەجايدىڭ ورتالىق ازياداعى ءىرى جۇك حابتارىنىڭ ءبىرى رەتىندەگى ورنىن نىعايتىپ, شەتەلدىك اۋە كومپانيالارىمەن ىنتىماقتاستىق اياسىن كەڭەيتەدى جانە قازاقستاننىڭ سىرتقى ەكونوميكالىق بايلانىستارىن دامىتۋعا جاڭا مۇمكىندىكتەر تۋعىزادى.
جالپى RA3 سەرتيفيكاتىن الۋ – قازاقستاننىڭ حالىقارالىق كولىك جانە ساۋدا دالىزدەرىنە ىقپالداسۋ جولىنداعى ماڭىزدى قادام سانالادى. سونداي-اق ول ءوڭىردىڭ ينۆەستيتسيالىق جانە ىسكەرلىك تارتىمدىلىعىن ارتتىرۋعا ىقپال ەتەدى دەيدى ماماندار.
سونىمەن بىرگە شىمكەنت اۋەجايىندا ەكىنشى ۇشۋ-قونۋ جولاعى سالىنادى. وسىلايشا مەگاپوليستىڭ حالىقارالىق اۋە ايلاعى زاماناۋي كولىك-لوگيستيكالىق حابقا اينالادى.
جاڭا جولاقتىڭ ۇزىندىعى – 3500 مەتر, ەنى – 60 مەتر بولادى. پسن-80 ساناتىنداعى توسەمنىڭ بەرىكتىگى جوعارى جۇك كوتەرىمدى اۋە كەمەلەرىن قابىلداۋعا مۇمكىندىك بەرەدى.