بىرىڭعاي جيناقتاۋشى زەينەتاقى قورىنان (بجزق) قاراجاتتى زاڭسىز شىعارۋ فاكتىلەرى بويىنشا جيناق يەلەرىنە جاۋاپكەرشىلىك جۇكتەلمەيدى. بۇل تۋرالى قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەمەسوۆ مالىمدەدى, دەپ حابارلايدى Egemen.kz.
ايتۋىنشا, قازاقستاندىقتارعا ەشقانداي ايىپ تاعىلمايدى. سەبەبى ولار ءوز جيناقتارىن پايدالانعان. دەگەنمەن زەينەتاقى قاراجاتىن مەرزىمىنەن بۇرىن الۋ فاكتىسى بولعانىمەن, قىلمىستىق جازا تەك الاياقتىق سحەمانى ۇيىمداستىرعان تاراپتارعا قولدانىلادى.
ازاماتتارعا كىنا ارتىلمايدى. ولار وزدەرىنىڭ قارجىسىن الدى. بىراق بجزق قاراجاتىن زاڭسىز شىعارۋ ىسىنە تىكەلەي قاتىسقان ستوماتولوگيالىق كلينيكالار مەن ۇيىمداستىرۋشىلار جاۋاپقا تارتىلادى, – دەدى جەڭىس ەلەمەسوۆ.
اگەنتتىكتىڭ مالىمەتىنشە, مەملەكەتتىك زەينەتاقى قورىنداعى قارجى نەگىزىنەن ءتىس ەمحانالارى ارقىلى زاڭسىز الىنعان. كەمىندە بەس توپ وكىلدەرى جەتكىلىكتىلىك شەگىنەن اسقان جيناقتارى بار ازاماتتاردى تاۋىپ, قىزمەتىن جارنامالاعان.
كەلىسىمگە كەلگەن كليەنتتەرگە مەملەكەتتىك ەمحانالاردىڭ دارىگەرلىك-كونسۋلتاتيۆتىك كوميسسيالارى «زەينەتاقى جيناعى ەسەبىنەن ستوماتولوگيالىق ەم قاجەت» دەگەن جالعان قورىتىندى دايىنداعان. ال جەكە كلينيكالار قۇنى 17 ميلليون تەڭگەگە دەيىن جەتەتىن قىمبات شەتەلدىك پلومبا ورناتىلعانى تۋرالى جالعان قۇجاتتار مەن تۇبىرتەكتەر بەرگەن.
وسى نەگىزدە زەينەتاقى قارجىسى شەشىلىپ, دەلدالدار ونىڭ شامامەن 30 پايىزىن ءوز ۇلەسى رەتىندە العان. قالعان سوما جيناق يەلەرىنە قولما-قول اقشا تۇرىندە بەرىلىپ وتىرعان.