قاراعاندى قالاسىنىڭ ورتالىق مادەنيەت جانە دەمالىس ساياباعىندا پوليتسيا قىزمەتكەرلەرىنىڭ جۇمىسىنا ارنالعان «زاڭ مەن ءتارتىپ» اتتى فوتوكورمە ۇيىمداستىرىلدى, دەپ جازادى Egemen.kz.
كورمەدە دەپارتامەنتتىڭ ءباسپاسوز قىزمەتى مۇراعاتىنان الىنعان 30-دان استام فوتوسۋرەت قويىلدى. ەكسپوزيتسياعا «ارلان» ارنايى جاساق ساربازدارىنىڭ, پاترۋلدىك پوليتسيانىڭ جانە وزگە دە بولىمشەلەردىڭ قىزمەت بارىسىنداعى بىرەگەي ساتتەرى ەندى. ءاربىر سۋرەت قۇقىق قورعاۋ ورگاندارى جۇمىسىنىڭ شىنايى ءارى كوپشىلىككە بەيمالىم تۇستارىن پاش ەتەدى.
سونىمەن قاتار, ءىس-شارا بارىسىندا ەسىرتكى قىلمىسىنا قارسى ءىس-قيمىل باسقارماسى مەن جەرگىلىكتى پوليتسيا قىزمەتىنىڭ ماماندارى تۇرعىندارمەن پروفيلاكتيكالىق اڭگىمەلەر وتكىزىپ, ناشاقورلىقتىڭ جانە تۇرمىستىق زورلىق-زومبىلىقتىڭ الدىن الۋ ماسەلەلەرىنە توقتالدى.
— كورمەنىڭ باستى ماقساتى — زاڭعا جانە ونى كۇندەلىكتى ەڭبەگىمەن قورعاپ جۇرگەن ادامدارعا قۇرمەتتى ارتتىرۋ. بۇل فوتوسۋرەتتەر 2005 جىلدان بەرگى پوليتسيا قىزمەتىنىڭ ماڭىزدى ساتتەرىن بەينەلەيدى. ءبىز «زاڭ مەن ءتارتىپ» قاعيداسىنىڭ ءمان-ماڭىزىن ايقىن كورسەتەتىن ەڭ ۇزدىك كادرلاردى تاڭدادىق. قوناقتاردىڭ پىكىرىنە قاراعاندا, جۇمىستار كورەرمەندەرگە ەرەكشە اسەر قالدىردى, — دەدى پد ءباسپاسوز قىزمەتىنىڭ ەرەكشە تاپسىرمالار جونىندەگى اعا ينسپەكتورى باتىرحان سمايلوۆ.
قالا تۇرعىنى ەرنار راقىشەۆ ءوز اسەرىمەن ءبولىستى.
— فوتوكورمە جوعارى دەڭگەيدە ۇيىمداستىرىلعان. بۇل سۋرەتتەر پوليتسيا قىزمەتىنىڭ ادەتتە كوپشىلىككە كورىنبەيتىن قىرلارىن كورسەتتى. وسىنداي ەڭبەككە قۇرمەتپەن قاراۋعا جانە سەنىم ارتۋعا بولادى. پوليتسيا قىزمەتكەرلەرىنە تابىس تىلەيمىن.