«قازاقستان حالقىنا» قورى قۇرىلعالى بەرى الماتى وبلىسىنىڭ تۇرعىندارىنا جالپى سوماسى 10,7 ملرد تەڭگە شاماسىندا قايىرىمدىلىق كومەگىن كورسەتتى. وڭىردە 21 الەۋمەتتىك جوبا جۇزەگە اسىرىلدى. پرەزيدەنت تاپسىرماسىنا ساي قور قاراجاتىن كادەگە جاراتىپ جاتقان مەكەمەلەردە جۇمىس قارقىندى جۇرگىزىلىپ, قاراپايىم حالىق يگىلىگىن كورىپ وتىر.
سونىڭ ءبىرى – تالعار اۋدانى قىزىلقايرات اۋىلىندا ورنالاسقان «پسيحونەۆرولوگيالىق اۋرۋلاردى جانە تىرەك-قيمىل اپپاراتى بۇزىلىستارى بار بالالارعا ارنالعان «اقجول-م» وڭالتۋ ورتالىعى». ىسكە قوسىلعانىنا ون جىلعا جۋىقتاعان ورتالىققا 2023 جىلى «قازاقستان حالقىنا» قورى 942 ملن تەڭگە قارجى قاراستىرىپ, زاماناۋي وزىق ۇلگىدەگى جابدىقتار ساتىپ الىپ بەردى. سونىڭ ارقاسىندا ناۋقاسقا داۋا بولاتىن سوڭعى ۇلگىدەگى كابينەتتەر سانى ارتتى. ناتيجەسىندە, بۇگىندە ورتالىق 1 جاستان 18 جاسقا دەيىنگى 350-گە جۋىق ناۋقاس بالاعا ءتيىمدى كومەك كورسەتىپ جاتىر.
«بالام قازىر 18 جاستا. تالماسى ۇستاپ قالادى. دارەتكە دە دۇرىس وتىرا الماي, جايالىقپەن جۇرۋگە ءماجبۇر. وسى ورتالىققا كەلىپ, ەم العالى بەرى ءتاۋىر بولىپ قالدى. بالالاردى اياعىنان تۇرعىزۋىنا سەپ بولىپ جاتقان قايىرىمدى, مەيىرىمدى جاندارعا العىسىمىزدى بىلدىرەمىز», دەيدى ناۋقاس بالانىڭ اناسى ءلايلا تۇعىلباەۆا.
زاماناۋي قۇرىلعىلارمەن جابدىقتالعان ورتالىقتا بىلىكتى ماماندار جۇمىس ىستەيدى.
«دتسپ بالالاردى قابىلدايمىز. مۇندا دارىگەر تاعايىنداعان دياگنوزىنا قاراي 20–40 مينۋت جاتادى. ەم العان بالالار ون كۇن سايىن دەمالادى. قازىردە سىناق جاساپ, اۋتيزم بالالاردى دا ۇيقىسىن قالپىنا كەلتىرۋ, ءوزىن پسيحولوگيالىق تىنىشتاندىرۋ ماقساتىندا الىپ جاتىرمىز. قۇرعاق ۆانناعا جاتقان كەزدە بۋىندارعا سالماق تۇسپەيدى ءارى بۋىندار بوسايدى. ودان شىعىپ ەمدەۋ-ساۋىقتىرۋ كابينەتىنە بارادى. مۇندا بۋىنداردى ۇستاتۋعا مۇمكىندىك بولادى», دەيدى ءجۇزۋ جونىندەگى نۇسقاۋشى دۋمان سادۋاقاس.
بەلبۇلاق اۋىلىندا 14 پەن 29 جاس ارالىعىنداعى مۇگەدەكتىگى بار ازاماتتاردى يننوۆاتسيالىق پروتەزدىك-ورتوپەديالىق بۇيىمدارمەن قامتاماسىز ەتۋ ورتالىعى ورنالاسقان. مەكەمە «Medicare International» جشس دەپ اتالادى. مۇندا جىلىنا 2 مىڭعا جۋىق پروتەز شىعارىلادى. بۇل ورتالىق تا اتالعان قوردىڭ قامقورلىعىن كورىپ وتىر. 2023 جىلدان بەرى 196 ادامعا 213 يننوۆاتسيالىق پروتەز تارتۋ ەتكەن. ءونىمنىڭ جالپى قۇنى 1 ملرد 400 ملن تەڭگەنى قۇرايدى. ونىڭ ىشىندە الماتى وبلىسىندا 144 ملن تەڭگە يگەرىلىپ, 22 ازامات يگىلىگىن كورگەن. سونىڭ ءبىرى 29 جاستاعى ەرجىگىت مۇقامەديا. وسى ورتالىقتا جۇمىس ىستەيتىن ول وزىنە ىڭعايلى ءارى جايلى پروتەز جاساتىپ العانىنا ريزاشىلىعىن ءبىلدىردى.
«قور مەملەكەت باسشىسىنىڭ باستاماسىمەن 2022 جىلى اشىلدى. سودان بەرى قايىرىمدىلىق جوبالارى دەنساۋلىق ساقتاۋ, ءبىلىم بەرۋ, سونداي-اق الەۋمەتتىك قولداۋ سالالارىندا جۇزەگە اسىرىلىپ كەلەدى», دەدى قحق اعا جوبا مەنەدجەرى دينارا نۇرقاسىموۆا.
سونداي-اق «قازاقستان حالقىنا» قورى 2022–2025 جىلدار ارالىعىندا الماتى قالاسىندا دا جالپى سوماسى 21,6 ملرد تەڭگەگە 20 قايىرىمدىلىق جوبا مەن باعدارلامانى جۇزەگە اسىردى.
الماتى وبلىسى