اتوم ەلەكتر ستانتسياسىنا اتاۋ بەرۋ ءۇشىن كونكۋرس جاريالاندى

ءاربىر قازاقستاندىق ءوز نۇسقاسىن eGov Mobile ءموبيلدى قوسىمشاسى ارقىلى ۇسىنا الادى. قوسىمشانىڭ باستى پاراقشاسىندا «اەس-كە اتاۋ ۇسىنىڭىز» باننەرى ورنالاستىرىلعان. سونداي-اق پايدالانۋشىلارعا كونكۋرستىڭ باستالعانى جونىندە push-حابارلاما جىبەرىلەدى.

ۇيىمداستىرۋشىلاردىڭ ايتۋىنشا, باستامانىڭ نەگىزگى ماقساتى – بولاشاق ستانتسياعا تاريحي, مادەني جانە ۇلتتىق قۇندىلىقتاردى ايقىن كورسەتەتىن اتاۋ تاڭداۋ.

كونكۋرسقا قاتىسۋ ءۇشىن قوسىمشادا ءتىلدى تاڭداپ, اتاۋ نۇسقاسىن ەنگىزۋ قاجەت. قالاعان جاعدايدا اتاۋدىڭ ماعىناسىنا قىسقاشا تۇسىنىكتەمە بەرۋگە بولادى. سونىمەن بىرگە قاتىسۋشى كونكۋرستىڭ رەسمي قاعيدالارىمەن تانىسقانىن راستاۋى ءتيىس.

ۇسىنىستاردى قابىلداۋ 2025 جىلعى 10 قازان كۇنى ساعات 23:59-عا دەيىن جالعاسادى. قاعيدالارمەن اتوم ەنەرگياسى جونىندەگى اگەنتتىكتىڭ رەسمي سايتىندا جانە ۆەدومستۆونىڭ الەۋمەتتىك جەلىدەگى پاراقشالارىندا تانىسۋعا بولادى.

ۇيىمداستىرۋشىلار بارشا ازاماتتاردى ەلىمىزدىڭ ەنەرگەتيكا سالاسىنىڭ تاريحىنا ۇلەس قوسىپ, قازاقستاننىڭ العاشقى اتوم ەلەكتر ستانتسياسىنا اتاۋ تاڭداۋعا بەلسەندى اتسالىسۋعا شاقىردى.