سەمەيدەن ەلىمىزدىڭ ءىرى قالالارىنا قاتىنايتىن اۋە رەيستەرىنىڭ سانى ارتىپ كەلەدى. 23 قىركۇيەكتەن باستاپ «قاراعاندى – سەمەي – قاراعاندى» باعىتىندا سىيىمدىلىعى 50 ورىندىق «Bombardier CRJ200» ۇشاعى جولاۋشىلاردى تاسىمالداي باستادى, دەپ جازادى Egemen.kz.
اكىمدىكتىڭ مالىمەتىنشە, سۋبسيديالانعان رەيستى «SCAT» اۋە كومپانياسى جۇزەگە اسىرادى. جولاۋشىلار اپتاسىنا 2 رەت – سەيسەنبى جانە بەيسەنبى كۇندەرى قاتىنايتىن بولادى. بيلەت باعاسى – 15 000 تەڭگە.
جاڭا باعىتتىڭ اشىلۋى تۇرعىندارعا قولايلى ءارى قولجەتىمدى باعادا ساپارلاۋعا مۇمكىندىك بەرەدى.
– بىرنەشە جىل بۇرىن «قاراعاندى-سەمەي» باعىتىنداعى اۋە قاتىناسى جابىلىپ قالعان ەدى. قايتادان اشىلعانىنا وتە قۋانىشتىمىز. سەمەيدەن قاراعاندىعا كەلۋ ءۇشىن استانا ارقىلى پويىزبەن جۇرەتىنبىز. قازىر جولاۋشىلارعا وتە ىڭعايلى. ءبىر جارىم ساعات شاماسىندا سەمەيگە جەتىپ الامىز, – دەدى قاراعاندى قالاسىنىڭ تۇرعىنى.
قازىر سەمەي قالاسىنان «سەمەي – الماتى», «سەمەي – استانا», «سەمەي – ءۇرجار», «سەمەي – قاراعاندى» باعىتتارى بويىنشا اۋە رەيستەرى بار. اتالعان رەيستەردى «FlyArystan», «وڭتۇستىك اسپانى», «SCAT» اۋە كومپانيالارى جۇزەگە اسىرىپ كەلەدى.
ال بۇل بۇگىنگى جاڭا باعىت رەسپۋبليكالىق بيۋدجەتتەن سۋبسيديا بەرىلگەن جانە كولىك مينيسترلىگىنىڭ ازاماتتىق اۆياتسيا كوميتەتىنىڭ جانە اباي وبلىسى اكىمدىگىنىڭ قولداۋىمەن اشىلىپ وتىر.
اباي وبلىسى