شانحاي تەاتر ينستيتۋتى العاش رەت ادام ەمەس ستۋدەنتتى قابىلدادى. «سيۋەبا 01» دەپ اتالاتىن روبوت ەندى الداعى ءتورت جىلدا «ساندىق ورىنداۋشىلىق ديزاين» ماماندىعى بويىنشا ءبىلىم الادى, دەپ حابارلايدى Egemen.kz سينحۋا اگەنتتىگىنە سىلتەمە جاساپ.
175 سم بويلى, 32 كەلىلىك گۋمانويد ساحنالىق قيمىلدار مەن ءداستۇرلى قىتاي وپەراسىنىڭ تەحنيكاسىن جۇيەلى تۇردە زەرتتەمەك. جوبا شانحاي تەاتر ينستيتۋتى مەن شانحاي پوليتەحنيكالىق ۋنيۆەرسيتەتىنىڭ بىرلەسكەن باستاماسى. ۋنيۆەرسيتەت ينجەنەرلەرى روبوتتىڭ تەحنيكالىق بازاسىن ازىرلەسە, تەاتر ينستيتۋتى ونىڭ كوركەمدىك قابىلەتىن دامىتۋعا جاۋاپتى.
ايتا كەتەيىك, «سيۋەبا 01» بۇعان دەيىن بەيجىڭدەگى جارتىلاي مارافوندا گۋمانويد روبوتتار اراسىندا جۇلدەگەر اتانعان «سينچجە № 2»-ءنىڭ جەتىلدىرىلگەن نۇسقاسى. جاڭا مودەل جەڭىل بيوميمەتيكالىق بۇلشىقەتتەرمەن, شىنايى ميميكا جۇيەسىمەن جانە ۇزدىكسىز 6 ساعات جۇمىس ىستەۋ مۇمكىندىگىمەن ەرەكشەلەنەدى. ول 100-دەن اسا ادامعا ءتان بەت قيمىلىن جاساپ, كورەرمەن رەاكتسياسىنا قاراي ءوز قويىلىمىن بەيىمدەي الادى.
جوبا جەتەكشىلەرى روبوت ازىرگە قوزعالىس مانەرىندە جەتىلۋدى قاجەت ەتەتىنىن ايتادى. سوندىقتان كاسىبي ورىنداۋشىلاردىڭ قيمىلىن كوشىرىپ, ارنايى دەرەكتەر جيىنتىعى ارقىلى ۇيرەتۋ كوزدەلگەن. بولاشاقتا ول بەينەجازبالاردان تىكەلەي ۇيرەنە الادى دەپ كۇتىلەدى.
شانحاي تەاتر ينستيتۋتىنىڭ پروفەسسورى يان ءتسينتسيننىڭ ايتۋىنشا, باستامانىڭ باستى ماقساتى — ونەر مەن تەحنولوگيانى ءتۇيىستىرىپ, قىتاي وپەراسى سياقتى مادەني مۇرانىڭ جاڭا بۋىنعا جەتۋىنە جول اشۋ.