وقۋ-اعارتۋ مينيسترلىگىنىڭ باستاماسىمەن ءبىلىم بەرۋ سالاسىنىڭ قىزمەتكەرلەرى جاساندى ينتەللەكتىنى قولدانۋ بويىنشا وقىتۋدان ءوتتى. وقىتۋ ء«بىلىم بەرۋدەگى ايماقتىق كوشباسشىلىق: يننوۆاتسيالار جانە ارەكەتتەگى جاساندى ينتەللەكت» كاسىبي دامۋ باعدارلاماسى اياسىندا ۇيىمداستىرىلدى, دەپ حابارلايدى Egemen.kz.
اتالعان باعدارلاما 2025 جىلدىڭ اقپان ايىنان باستاپ ىسكە اسىرىلىپ جاتىر. وقۋ-اعارتۋ مينيسترلىگىنىڭ اقپاراتىنا سۇيەنسەك, بۇل جوبا تسيفرلىق ترانسفورماتسيا جانە جاساندى ينتەللەكت تەحنولوگيالارىن ەنگىزۋدە ءبىلىم بەرۋ جۇيەسى باسشىلارىنىڭ ستراتەگيالىق ويلاۋىن, كوشباسشىلىق جانە باسقارۋشىلىق قۇزىرەتتىلىكتەرىن دامىتۋ ماقساتىندا قولعا الىنعان.
وقۋعا وقۋ-اعارتۋ مينيسترلىگى ورتالىق اپپاراتىنىڭ, وڭىرلىك باسقارمالار مەن ءبىلىم بولىمدەرىنىڭ 74 باسشىسى, سونداي-اق ەلىمىزدىڭ بارلىق وڭىرلەرىنەن مەكتەپ, بالاباقشا جانە كوللەدج ديرەكتورلارى قاتىستى. اتالعان باعىت ءبىلىم بەرۋ جۇيەسىنىڭ نەگىزگى سىن-قاتەرلەرىنە بىرىڭعاي كوزقاراس قالىپتاستىرۋعا جانە پراكتيكالىق باسقارۋشىلىق شەشىمدەر ازىرلەۋگە مۇمكىندىك بەردى.
باعدارلاما تاقىرىپتارى كوشباسشىلىق قۇزىرەتتىلىكتەردى دامىتۋ, ستراتەگيالىق جوسپارلاۋ, تجكب ترانسفورماتسياسى جانە ءبىلىم بەرۋگە جاساندى ينتەللەكتىنى ەنگىزۋ تاجىريبەلەرىن قامتىدى. سونىمەن قاتار پەداگوگيكالىق حاكاتون وتكىزىلىپ, وڭىرارالىق كوماندالار ءبىلىم بەرۋ ساپاسىن ارتتىرۋ جانە جاساندى ينتەللەكتىنى قولدانۋ بويىنشا پراكتيكالىق جوبالار ازىرلەدى.
كۋرس ناتيجەسىندە پراكتيك-مەنەدجەرلەردىڭ قاۋىمداستىعى قۇرىلىپ, وڭىرلىك دەڭگەيدە ىسكە اسىرىلاتىن جوبالار دايىندالدى, سونداي-اق وقىتۋ مەن باسقارۋدا جاساندى ينتەللەكتىنى ساۋاتتى پايدالانۋعا ارنالعان ادىستەمەلىك ماتەريالدار توپتاماسى ازىرلەندى.