پاترۋلدىك پوليتسيا قىزمەتكەرلەرى «قاۋىپسىز جول» جەدەل-پروفيلاكتيكالىق ءىس-شاراسى كەزىندە ماس كۇيدە كولىك رۋلىنە وتىرعان 12 جۇرگىزۋشىنى ۇستادى, دەپ جازادى Egemen.kz.
اتىراۋ قالالىق پوليتسيا باسقارماسىنىڭ اقپاراتىنا قاراعاندا, كەيىنگى كەزدە جول-كولىك وقيعالارى جيىلەگەن. ونىڭ باستى سەبەپتەرى – جىلدامدىق رەجيمىن ساقتاماۋ, ماس كۇيدە كولىك جۇرگىزۋ, مانەۆر جاساۋ ەرەجەلەرىن بۇزۋ.
«جول اپاتىنىڭ سالدارىنان تۇرعىنداردىڭ قازا تاۋىپ, ءارتۇرلى دەنە جاراقاتىن العانى تىركەلىپ وتىر. «قاۋىپسىز جول» جەدەل-پروفيلاكتيكالىق ءىس-شاراسى كەزىندە پاترۋلدىك پوليتسيا قىزمەتكەرلەرى ماس كۇيدە كولىك جۇرگىزىپ جۇرگەن 12 جۇرگىزۋشىنى انىقتادى. جۇرگىزۋشىلەرگە قاتىستى اكىمشىلىك قۇقىق بۇزۋشىلىق تۋرالى كودەكسىنىڭ 608-بابىمەن اكىمشىلىك حاتتامالار تولتىرىلدى. جيناقتالعان ءىس قۇجاتتارى مامانداندىرىلعان اكىمشىلىك سوتىنا جولداندى. سوت شەشىمىمەن قۇقىق بۇزعان جۇرگىزۋشىلەر 7 جىل مەرزىمگە كولىك قۇرالىن باسقارۋ قۇقىعىنان ايىرىلىپ, 20 تاۋلىككە اكىمشىلىك قاماققا الىندى», دەپ حابارلادى پوليتسيا باسقارماسىنان.