قر باس پروكۋراتۋراسى جولداعان سۇراۋ سالۋ ناتيجەسىندە رەسەي فەدەراتسياسى اۋماعىندا ۇستالعان كۇدىكتى قازاقستانعا ەكستراديتسيالاندى. ول بيۋدجەت قاراجاتىن اسا ءىرى كولەمدە جىمقىردى دەگەن كۇدىككە ءىلىنىپ وتىر, دەپ حابارلايدى Egemen.kz.
تەرگەۋ دەرەكتەرىنە سايكەس, قۇرىلىس كومپانياسىنىڭ باسشىسى بولعان بۇل ازامات 2020–2022 جىلدارى سەرىكتەستەرىمەن الدىن الا كەلىسىپ, جالعان كەلىسىمشارتتار جاساسقان. قارجىنى اففيليرلەنگەن ۇيىمدار ارقىلى اۋدارۋ ارقىلى ول «سامۇرىق-ەنەرگو» اكتسيونەرلىك قوعامىنىڭ ەنشىلەس كومپانياسىنان 8,5 ميلليارد تەڭگەدەن استام قاراجاتتى زاڭسىز يەمدەنگەن.
«اتالعان قاراجات اقمولا وبلىسىندا جەل ەلەكتر ستانتسياسىن سالۋعا ارنالعان بولاتىن. قىلمىس جاساعاننان كەيىن كۇدىكتى جاسىرىنىپ, وعان حالىقارالىق ىزدەۋ جاريالانعان. وسى جىلدىڭ اقپان ايىندا ول رەسەي فەدەراتسياسىنىڭ اۋماعىندا ۇستالىپ, قازاقستان رەسپۋبليكاسى باس پروكۋراتۋراسىنىڭ سۇراۋ سالۋى بويىنشا ونى ەكستراديتسيالاۋ تۋرالى شەشىم قابىلداندى. قازىرگى ۋاقىتتا كۇدىكتى تەرگەۋ يزولياتورىنا قامالدى», دەپ حابارلادى باس پروكۋراتۋرانىڭ ءباسپاسوز قىزمەتى.
اتالعان ىسكە قاتىسى بار وزگە ادامدار مامىر ايىندا سوت ۇكىمىمەن ءتۇرلى مەرزىمگە باس بوستاندىعىنان ايىرىلعان.
سونىمەن قاتار قولدانىستاعى زاڭناماعا سايكەس مۇنداي قۇقىق بۇزۋشىلىق ءۇشىن م ۇلىكتى تاركىلەۋ جازاسىمەن قاتار 5 جىلدان 10 جىلعا دەيىن باس بوستاندىعىنان ايىرۋ كوزدەلگەن.