الماتى مەرەكەسى ايرىقشا مۋزىكالىق وقيعامەن ورنەكتەلدى. Almaty Cover Show اتتى اۋقىمدى شوۋعا 50 مىڭنان استام كورەرمەن جينالدى. شاھار تۇرعىندارى مەن قوناقتارى 90-2000 جىلدارداعى التىن حيتتەردىڭ كاۆەر نۇسقاسىن تىڭداپ, قازىرگى تاڭدا حيت-پارادتاردى باعىندىرىپ جۇرگەن زاماناۋي ترەكتەردى تاماشالادى, دەپ جازادى Egemen.kz.
كەشتىڭ باستى حەدلاينەرى كوپتەن كۇتكەن Ninety One توبى بولدى. سونداي-اق, ساحنا تورىنە ADAM, «ازيا» توبى, باحىت شاداەۆا, Qali, زارينا وماروۆا, ارمان قونىر مەن اشا ماتاي, ەرلان كوكەەۆ, سەيفۋللين جولبارىس, جەڭىس ىسقاقوۆا, جازيرا مەن جانبولات, ءمولدىر اۋەلبەكوۆا, باعىم مۇحيتدەنوۆا, توقتار مەن بەيبىت, مۇحتار حانزادا جانە باسقا دا ونەر يەلەرى شىقتى. ءىس-شارانى تانىمال شوۋمەن تۇرسىنبەك قاباتوۆ جۇرگىزدى.
«مەن ستۋدەنتپىن, دوستارىممەن بىرگە كەلدىم. قازاقستاندىق سۇيىكتى ارتيستەرىمنىڭ كوپشىلىگى وسىندا ونەر كورسەتتى. اسىرەسە, Ninety One توبىنىڭ ساحناعا شىعۋىن تاعاتسىزدانا كۇتتىك», – دەدى ايدانا قايىپباي.
«مەن بۇل ءىس-شاراعا العاش رەت كەلدىم, ەموتسيا كەرەمەت. جاندى داۋىستا ءان تىڭدادىق. كونتسەرتتىڭ اتموسفەراسى كەرەمەت اسەر سىيلادى. جاڭا انشىلەردى تانىپ ءبىلدىم, العان اسەرىمدى مىندەتتى تۇردە Instagram-عا جازامىن», – دەدى ەلنارا ارمانقىزى.
Almaty Cover Show ناعىز مۋزىكالىق مارافونعا اينالدى. مۇندا كلاسسيكا, رەترو مەن زاماناۋي اندەر توعىسىپ, قالاعا قۋانىش پەن بىرلىك سىيلادى. بۇل كەش الماتىنىڭ ونەردى ۇلىقتاپ, مۋزىكانى دارىپتەي بىلەتىن قالا ەكەنىن تاعى ءبىر مارتە دالەلدەدى.
ايتا كەتەيىك, بۇگىن استانا الاڭىندا ساعات 10:30-دان 22:00-گە دەيىن مەرەكەلىك ۇلكەن كونتسەرت ءوتىپ جاتىر. حەدلاينەرلەر قاتارىندا – قايرات نۇرتاس, 6ellucci, TURAR, «مۋزارت» توبى, الان چەركاسوۆ, قۇرماش ماحانوۆ, ەركەش حاسەن جانە باسقا دا بەلگىلى ونەرپازدار بار.