الماتىدا 8, 10 جانە 12 جاسقا دەيىنگى بالالار اراسىندا شاحماتتان الەم چەمپيوناتى - FIDE World Cadet Chess Championships 2025 باستالدى. ءتۋرنيردى وتكىزۋ قالا كۇنىن مەرەكەلەۋگە سايكەس كەلدى. سالتاناتتى اشىلۋ ءراسىمى بالۋان شولاق اتىنداعى سپورت سارايىندا ءوتتى. وعان قر پرەمەر-ءمينيسترىنىڭ ورىنباسارى ەرمەك كوشەرباەۆ, الماتى اكىمى دارحان ساتىبالدى, فيدە پرەزيدەنتى اركادي دۆوركوۆيچ جانە قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ قاتىستى, دەپ جازادى Egemen.kz.
چەمپيوناتقا 88 ەلدەن 851 جاس شاحماتشى, ونىڭ ىشىندە قازاقستاننىڭ 231 وكىلى قاتىسادى. ولاردىڭ ىشىندە 47 الماتىلىق بار. بۇل قالانى ەلىمىزدىڭ جاس شاحماتشىلارىن دايارلايتىن باستى ورتالىقتارىنىڭ بىرىنە اينالدىرادى.
قر پرەمەر-ءمينيسترىنىڭ ورىنباسارى ەرمەك كوشەرباەۆتىڭ ايتۋىنشا, قازاقستاندا شاحمات سپورتتىڭ ءبىر ءتۇرى عانا ەمەس, ءبىلىم بەرۋدىڭ ماڭىزدى بولىگى رەتىندە قاراستىرىلادى. «پرەزيدەنت قاسىم-جومارت توقاەۆتىڭ قولداۋىنىڭ ارقاسىندا شاحمات قارقىندى دامىپ كەلەدى. وتكەن جىلدىڭ وزىندە ءبىزدىڭ سپورتشىلار حالىقارالىق ارەنادا 160 مەدال جەڭىپ الدى. بۇگىن شاحماتتى باستاۋىش سىنىپتاردىڭ مەكتەپ باعدارلاماسىنا ەنگىزۋ ماسەلەسى قاراستىرىلىپ وتىر. ويتكەنى بۇل ويىن بالالاردى لوگيكاعا, سابىرعا, زەيىنگە جانە ستراتەگيالىق ويلاۋعا ۇيرەتەدى. بۇل مەملەكەتتىڭ زياتكەرلىك ۇلت قالىپتاستىرۋ باعىتىنا سايكەس كەلەدى», - دەدى ول. ءوز كەزەگىندە الماتى اكىمى دارحان ساتىبالدى وسىنداي اۋقىمدى ءتۋرنيردى وتكىزۋ قالا ءۇشىن عانا ەمەس, بۇكىل ەل ءۇشىن ماڭىزدى وقيعا ەكەنىن اتاپ ءوتتى.
«بۇگىندە الماتى شاحمات الەمىندەگى ەڭ ايتۋلى جارىستاردىڭ ءبىرىن وتكىزىپ وتىر. اسىرەسە, چەمپيوناتتىڭ قالا كۇنى قارساڭىندا ءوتۋى ەرەكشە مانگە يە. بۇل ءبىز ءۇشىن قۇرمەت ءارى زور جاۋاپكەرشىلىك. ءتۇرلى ەلدەن كەلگەن 850-دەن استام بالا وسىندا جينالىپ, وزدەرىنىڭ زەردەسىن, تالانتىن جانە تاباندىلىعىن كورسەتىپ وتىر. شاحمات – حالىقتاردى بىرىكتىرەتىن, زياتكەرلىك بولاشاعىن قالىپتاستىراتىن امبەباپ ءتىل. الماتى قاتىسۋشىلار ءۇشىن قوناقجايلىقتىڭ, دوستىقتىڭ جانە جاڭا جەڭىستەردىڭ قالاسى بولىپ قالا بەرەتىنىنە سەنەمىن», – دەدى الماتى اكىمى.
الەم چەمپيوناتى 30 قىركۇيەككە دەيىن جالعاسادى. جارىس ۇلدار مەن قىزدار اراسىندا 8, 10 جانە 12 جاسقا دەيىن التى سانات بويىنشا جەڭىمپازداردى انىقتايدى. بارلىعى 11 تۋر وتەدى, ولار شۆەيتسارلىق جۇيە بويىنشا كلاسسيكالىق ۋاقىت باقىلاۋىمەن (90+30) ۇيىمداستىرىلادى. جارىس باعدارلاماسىنان بولەك, جاس شاحماتشىلاردى شىمبۇلاققا ەكسكۋرسيا جانە مادەني شارالار قامتىلعان دەمالىس كۇنى, سونداي-اق Satbayev University-دە وتەتىن «شاحمات ءبىلىم بەرۋدە» اتتى حالىقارالىق كونفەرەنتسيا كۇتىپ تۇر.
بىلتىر كادەتتەر اراسىنداعى الەم چەمپيوناتى يتاليانىڭ مونتەسيلۆانو قالاسىندا ءوتىپ, 77 ەلدەن 700-دەن استام شاحماتشى قاتىسقان ەدى. الماتىدا قاتىسۋشىلار سانى 88 ەلدەن 851-گە جەتىپ, تۋرنير تاريحىنداعى رەكورد ورناتتى. بۇل قازاقستاننىڭ قابىلداۋشى تاراپ رەتىندەگى جوعارى سەنىمىنە دالەل.
الەم چەمپيوناتىنىڭ الماتىدا ءوتۋى قازاقستاندى الەمدىك شاحماتتىڭ جاڭا ورتالىقتارىنىڭ ءبىرى رەتىندە نىعايتىپ, ەلدە بۇل سپورتتىڭ قارقىندى دامىپ كەلە جاتقانىن ايشىقتاي تۇسەدى.