تاسىن تۇرتسەڭ تاريحى سويلەيتىن اباي توپىراعىنان تاعى دا كونە جادىگەرلەر تابىلدى, دەپ جازادى Egemen.kz.
جارما اۋدانى قوستوبەدە دەگەن جەردەگى ەجەلگى قورعانداردا قازبا جۇمىستارى جۇرگىزىلگەن. مامانداردىڭ سوزىنشە, ەسكى قورعاندار ءارتۇرلى سەبەپتەرمەن توناۋعا ۇشىراعان. ايتكەنمەن ەسكى قورعاننان تابىلعان كونە جادىگەرلەر عالىمداردى تاڭعالدىرىپ وتىر. ارحەولوگ عالىمداردىڭ ايتۋىنشا, قوستوبە ماڭىندا تونالعان قورعانداردا ءالى دە تاريحي قۇندى جادىگەر مول. ارحەولوگتار بۇل جولعى قازبا جۇمىسى كەزىندە كونە بەلبەۋدىڭ قولا اشەكەيىن تاپقان. وندا ءبورى مەن بۇعىنىڭ ارپالىسى بەينەلەنگەن. دالىرەك ايتقاندا, قاسقىر بۇعىنىڭ تۋ سىرتىنان تاپ بەرگەنىن كورۋگە بولادى. ارحەولوگتاردىڭ ايتۋىنشا, تابىلعان زاتتار ساق داۋىرىنە تيەسىلى.
«قورعاندا ەرەسەك ادامنىڭ جەرلەنگەن ورنى انىقتالدى. بۇل جەرلەۋ ورىننان تابىلعان قىزىقتى دۇنيەلەردىڭ اراسىندا اڭ ستيلىندەگى اشەكەيلى بەلدىك تاستارىمەن بەزەندىرىلگەن زاتتار بار. سونداي-اق, اقيناق, التىن سىرعا جانە باسقا دا كوپتەگەن زات تابىلدى. ولار ءبىزدىڭ تاريحتا ءالى زەرتتەلمەگەن تىڭ دەرەكتەرىن تولىقتاي تۇسەرى ءسوزسىز», دەيدى ءا.مارعۇلان اتىنداعى ارحەولوگيا ينستيتۋتىنىڭ ديرەكتورى تيمۋر سماعۇلوۆ.
قازىر ماماندار تابىلعان جادىگەرلەردى تازالاۋ ۇستىندە ەكەنىن ايتادى. قۇندى جادىگەرلەر سول زاماننىڭ دەرەكتەرىن تەرەڭ تاني تۇسۋگە جول اشاتىنى بەلگىلى. سول سەبەپتى قورعاننىڭ قۇرىلىمى ارحەولوگتاردى قاتتى قىزىقتىرىپ وتىرعانى راس. ولاردىڭ سوزىنشە, قورىمدار بىرنەشە كەزەڭمەن سالىنعانعا ۇقسايدى.
«تاستاردى ورنالاستىرىپ, كىشكەنتاي قورعان جاساعان. ۋاقىت وتە كەلە ەكىنشى, ءۇشىنشى كەزەڭدەردە توپىراق قوسۋدى باستاپ, قورعاننىڭ ءوزى قالىپتاسا باستاعان. بۇل پروتسەسس ۋاقىت وتە ءجۇردى. تاس پەن توپىراق ارالاسقاننان كەيىن قورعاننىڭ توپىراق ءۇيىندىسى قالىپتاسقان», دەيدى ءا.مارعۇلان اتىنداعى ارحەولوگيا ينستيتۋتىنىڭ عىلىمي قىزمەتكەرى تالعات ايلىباەۆ.
جەرگىلىكتى مامانداردىڭ مالىمەتىنشە, قوستوبە جازىعىندا 150-دەن اسا قورعان مەن قورىم بار ەكەن. ولاردان تابىلعان جادىگەرلەر جان-جاقتى زەرتتەلۋى ءۇشىن زەرتحاناعا جىبەرىلەدى. سودان كەيىن ونى ورنالاستىرۋ جاعى ايقىندالادى.
اباي وبلىسى