ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقاەۆ ستراتەگيالىق ماڭىزعا يە «ورتالىق – باتىس» جوباسىن جۇزەگە اسىرۋ جونىندە تاپسىرما بەرگەن بولاتىن. وسى تاپسىرمانىڭ ورىندالۋىن قامتاماسىز ەتۋ ءۇشىن كولىك مينيسترلىگىندە ارنايى جيىن ءوتىپ, جۇمىس بارىسى تالقىلاندى, دەپ جازادى Egemen.kz.
جاڭا اۆتوجول ەلوردانى ارقالىق, تورعاي جانە ىرعىز ارقىلى ەلىمىزدىڭ باتىس وڭىرلەرىمەن جالعايدى. جوبا اياسىندا «استانا – ارقالىق» جانە «تورعاي – ىرعىز» باعىتتارىندا جاڭا جولدار سالىنادى. ال ارقالىق پەن تورعايدىڭ اراسىنداعى قازىرگى قولدانىستاعى جول كۇردەلى جوندەۋدەن وتكەندىكتەن, بۇرىنعى كۇيىندە پايدالانىلاتىن بولادى.
بۇگىندە قۇرىلىسقا قاجەتتى ارنايى تەحنيكا مەن جۇمىسشىلار جۇمىلدىرىلىپ, ۆاحتالىق قالاشىقتار تۇرعىزىلۋدا. سونىمەن قاتار توپىراقتىڭ قۇنارلى قاباتىن الۋ جۇمىستارى جۇرگىزىلىپ جاتىر.