مەملەكەت باسشىسىنىڭ بيىلعى جىلدى «جۇمىسشى ماماندىقتار جىلى» دەپ جاريالاۋى ەلىمىزدەگى ەڭبەكسۇيگىش ماماندارعا دەگەن قۇرمەتتىڭ ناقتى كورىنىسى. بۇل باستاما ەڭ الدىمەن, قوعامنىڭ ءتۇرلى سالاسىندا تەر توگىپ جۇرگەن مامانداردىڭ كاسىبي جەتىستىكتەرىن دارىپتەپ, ولاردىڭ ەڭبەگىن ايقىن كورسەتۋگە باعىتتالعان. ويتكەنى ەڭبەك تەك تابىس كوزى عانا ەمەس, ول ادامنىڭ بويىنداعى توزىمدىلىك پەن شىدامدىلىقتى, شىعارماشىلىق پەن شەبەرلىكتى شىڭدايتىن كۇش. كونديتەرلىك سالا دا ءدال وسىنداي تالاپتاردى قاجەت ەتەتىن ماماندىقتاردىڭ ءبىرى. مۇندا تەك ونىمدەردىڭ ۇيلەسەمى عانا ەمەس, سونداي-اق ماماننىڭ شەبەرلىگى مەن شىعارماشىلىعى دا كورىنىس تابادى.
ءتاتتىنى جاقسى كورمەيتىن ادام جوق شىعار ءسىرا, ءيا؟! اسىرەسە, ادەمى بەزەندىرىلگەن تورتتار كوزدىڭ جاۋىن الىپ, تابەتتى ارتتىرادى. دەسە دە, ولاردى ءپىسىرۋدىڭ ءوزى ۇلكەن ەڭبەك پەن توزىمدىلىكتى تالاپ ەتەدى. وسىنداي ەڭبەكتىڭ شىنايى باعاسىن ءبىلىپ, ونى ءوز كاسىبىنە اينالدىرعان جانداردىڭ ءبىرى – ينديرا باۋىرجان. ول «Baking Studio» كونديتەرلىك ونىمدەرىنىڭ نەگىزىن قالاۋشى, ون جىلدان بەرى ءتاتتى الەمىنىڭ قىر-سىرىن مەڭگەرىپ كەلە جاتقان تاجىريبەلى كونديتەر.
«نەگىزى مەن كىشكەنتاي كەزىمنەن تورت پىسىرگەندى جاقسى كورەتىنمىن. بالعىن شاقتان باستاۋ العان قىزىعۋشىلىعىم مەنىڭ كاسىبي جولىمنىڭ نەگىزى بولدى. 2015 جىلى ۇيدە باۋىرساق, ءبالىش سياقتى تاتتىلەردى ءپىسىرىپ باستادىم. سول كەزدەن باستاپ تۇتىنۋشىلارىم كوبەيدى. ولار كوڭىلىنەن شىققان سايىن بىزدەن تورت جانە باسقا دا ءتاتتى ونىمدەر سۇرايتىن. مىنە, ءدال سول ۋاقىتتان بەرى توقتاپ قالماي ءارى قاراي دامىپ جاتىرمىز», دەيدى ول. ينديرانىڭ العاشقى قادامى دا كوپشىلىككە ەتەنە تانىس «بالدى تورتتان» باستالعان ەكەن. «ول تورتتى ەڭ العاش رامازان ايىندا تاپسىرىسقا دايىندادىم. جاستايىمنان تاجىريبەم بولعاندىقتان بىردەن قولىمنان كەلدى. بىراق ول ۋاقىتتا كرەم دايىنداۋ جاعى قيىن ەدى. ويتكەنى قازاقستاندا ارنايى كىلەگەي, سۇزبەلى ىرىمشىك سەكىلدى ونىمدەر كەڭىنەن قولجەتىمدى بولماعان. ءبىز دۇكەندە بار قاراپايىم ونىمدەرمەن شەكتەلەتىنبىز», دەپ ەسكە الدى.
ۋاقىت وتكەن سايىن تۇتىنۋشىلاردىڭ تالعامى كۇردەلەنىپ, ەرەكشە تاپسىرىستاردى ورىنداۋىن وتىنە باستاعان. بۇل رەتتە ينديرا باۋىرجان كاسىبي شەبەرلىگىن جەتىلدىرىپ, ءبىلىم الۋعا دەن قويعان.
«العاشىندا رەسەيدىڭ كونديتەرلەرىنەن ونلاين ساباق الدىم. كەيىن ەلگە شەتەلدىك شەف-كونديتەرلەر كەلىپ, ماستەر-كلاس وتكىزدى. ءوزىم دە بىرنەشە رەت فرانتسيا, انگليا, كورەياعا بارىپ, تاجىريبەلى مامانداردىڭ ءتالىمىن الدىم. ولاردان ۇيرەنگەنىم كاسىبي وسۋىمە ۇلكەن سەرپىن بەردى», دەيدى ول.
التى جىل بويى ۇيدە تاپسىرىس قابىلداپ, ءونىم دايىنداعان ينديرا باۋىرجان ۋاقىت وتە ستۋديا اشۋدى قولعا العان. سولاي 2021 جىلى تۇتىنۋشىلار سانى ارتقان شاقتا ءوزىنىڭ جەكە كاسىبىن باستاپ, «Baking Studio»-نىڭ ىرگەتاسىن قالاعان. «ارينە, ستۋديا اشۋ وڭاي شەشىم بولعان جوق. ەڭ باسىندا جولداسىم ەكەۋمىز عانا جۇمىس ىستەدىك. كەيىن تاپسىرىسقا ۇلگەرمەي باستاعان سوڭ كوماندا جيناۋعا تۋرا كەلدى. قازىر ستۋديادا سەگىز ادام جۇمىس ىستەيدى. كونديتەرلىك ستۋدياداعى كۇن تاڭعى ساعات التىدان باستالادى. قىزمەتكەرلەر ءونىمنىڭ نەگىزىن دايىنداپ, ۆيترينانى تولتىرادى, تاپسىرىسقا ارنالعان بيسكۆيتتەردى پىسىرەدى. ساعات سەگىزدە ستۋديا ەسىگىن ايقارا اشىپ, كەلۋشىلەرگە تاتتىلەر مەن كوفە ۇسىنادى», دەدى ول. بۇگىندە بۇل جەر تەك كونديتەرلىك قانا ەمەس, كىشىگىرىم كوفەحاناعا اينالعان. جۇمىستىڭ وڭايى جوق. قاي ماماندىقتى الىپ قاراساق تا, ونىڭ وزىنە ءتان ەرەكشەلىگى مەن قيىندىعى بار. ال بۇل سالادا دا ءدام ۇيلەسىمى مەن ءونىم ساپاسى ءبىرىنشى ورىندا. سوندىقتان ينديرا باۋىرجان ءاربىر تۇتىنۋشىنىڭ تالعامىنا ساي ءونىم ۇسىنۋدى باستى قاعيداسىنا اينالدىرعان. وعان قوسا, شەبەر كونديتەردىڭ ەڭبەگىن دارالايتىن وزىندىك قولتاڭباسى بار. اۆتورلىق دەسەرتتەرى ارقىلى ول ءتاتتى الەمدى جاڭا قىرىنان اشىپ, كۇندەلىكتى اسسورتيمەنتتى جاڭارتىپ وتىرادى. مۇنداي تۋىندىلاردى دايىنداۋ تەك تاجىريبەنى عانا ەمەس, شىعارماشىلىقتى دا تالاپ ەتەتىنى ءسوزسىز.
«بىزدە كۇندە بالعىن ءونىم بولادى. كوپ دەسەرتتەرىمىز ءوزىمىزدىڭ اۆتورلىق تۋىندىلارىمىز. ءار كليەنتتىڭ تالعامىنا قاراي جۇمىس ىستەيمىز: بىرەۋىنە كرەمى كوپ ۇناسا, ەكىنشىسى كەرىسىنشە از بولعانىن قالايدى. سول سۇرانىستاردىڭ ءبارىن ەسكەرۋگە تىرىسامىز. بۇل وڭاي سالا ەمەس. كونديتەر بولۋ ءۇشىن ەڭ الدىمەن بۇل جۇمىستى شىن جۇرەكتەن جاقسى كورۋ كەرەك. قاتتى جاقسى كورگەن سايىن دامۋعا, جاڭا يدەيالاردى جۇزەگە اسىرۋعا دەگەن تالپىنىس ارتادى. ءبىز ءالى جاس ستۋديا بولعانىمىزبەن, ءبىراز شىڭداردى باعىندىردىق. قيىن كەزەڭدەردەن توقتاماي وتتىك», دەيدى كاسىبي اسپاز.
كونديتەرلىك ونەردىڭ قيىندىعى كوپ, بىراق سوعان قاراماستان ينديرا باۋىرجان تاباندىلىق پەن شىعارماشىلىقتى قاتار سەرىك ەتىپ كەلەدى. ول دايىنداعان ونىمدەر تالاي جۇرەككە جول تاۋىپ, تالاي قۋانىشتى ءساتتىڭ سەبەپكەرىنە اينالدى. ەڭبەك پەن شەبەرلىكتىڭ ءتاتتى توعىسى ءدال وسى جەردە تۇتاستىق تاپقان.