بۇگىن ءماجىلىس مادەنيەت جانە اقپارات مينيسترلىگى ازىرلەگەن ارحيۆ ءىسى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى, دەپ جازادى Egemen.kz.
زاڭ جوباسىندا قۇجاتتاردىڭ جاڭا تۇرلەرىن قوسا وتىرىپ, ۇلتتىق ارحيۆ قورىنىڭ قۇرامى ناقتى انىقتالادى. ولاردىڭ قاتارىندا تاجىريبەلىك- كونسترۋكتورلىق, جوبالىق-سمەتالىق جانە قالا قۇرىلىسى قۇجاتتاماسى, قازاقستاننان تىس جەردە تۇپنۇسقا رەتىندە تابىلعان ارحيۆتىك قۇجاتتاردىڭ كوشىرمەلەرى, سونداي-اق باسقا دا ماتەريالدار بار.
تاريحي-مادەني مۇرانى ساقتاۋ ماقساتىمەن مەملەكەتتىك بيۋدجەت قاراجاتى ەسەبىنەن جاسالعان اۋديوۆيزۋالدى قۇجاتتاردىڭ كوشىرمەلەرىن جەكە جانە زاڭدى تۇلعالاردىڭ ارحيۆتەرگە مىندەتتى تۇردە تاپسىرۋى تۋرالى نورمانى ەنگىزۋ ۇسىنىلىپ وتىر. بۇل شارا ۇلتتىق ارحيۆ قورىن تاۋەلسىز قازاقستان تاريحىنىڭ وقيعالارى مەن دەرەكتەرىن كورسەتەتىن قۇجاتتارمەن تولىقتىرۋدى قامتاماسىز ەتەدى.
ەڭبەك كودەكسىنە, سونداي-اق «ۇلتتىق ارحيۆ قورى جانە ارحيۆتەر تۋرالى», «ەلەكتروندى قۇجات جانە ەلەكتروندى تسيفرلىق قولتاڭبا تۋرالى», «اگروونەركاسىپ كەشەنى جانە اۋىلدى اۋماقتاردى دامىتۋدى مەملەكەتتىك رەتتەۋ تۋرالى», «دەربەس دەرەكتەر جانە ولاردى قورعاۋ تۋرالى» زاڭدارعا وزگەرىستەر ەنگىزىلەدى.