UEFA چەمپيوندار ليگاسىنىڭ نەگىزگى كەزەڭىندەگى العاشقى ويىندا الماتىلىق «قايرات» پورتۋگاليانىڭ «سپورتينگ» كلۋبىمەن كەزدەسەدى. ويىن قىركۇيەكتىڭ 18-نەن 19-ىنا قاراعان ءتۇنى, ەلوردا ۋاقىتىمەن ساعات 00:00-دە «Qazaqstan» تەلەارناسىنان تىكەلەي ەفيردە كورسەتىلەدى, دەپ حابارلايدى Egemen.kz.
سونىمەن قاتار «قايرات» چەمپيوندار ليگاسىنىڭ نەگىزگى كەزەڭىندە ەۋروپانىڭ ەڭ بەدەلدى كلۋبتارىمەن سىنعا تۇسەدى. قارسىلاستار قاتارىندا «رەال مادريد» (يسپانيا), «ينتەر» (يتاليا), «ارسەنال» (انگليا), «بريۋگگە» (بەلگيا), «سپورتينگ» (پورتۋگاليا), «وليمپياكوس» (گرەكيا), «پافوس» (كيپر) جانە «كوپەنگاگەن» (دانيا) بار. الماتىلىقتار بارلىعى سەگىز ويىن وتكىزەدى: تورتەۋى ءوز الاڭىندا, تورتەۋى سىرت الاڭدا.
ءتۋرنيردىڭ نەگىزگى كەزەڭىنە 36 كوماندا قاتىسادى. ءبىرىنشى تۋر 16 قىركۇيەكتە باستالىپ, سەگىزىنشى تۋر 2026 جىلدىڭ 28 قاڭتارىندا اياقتالادى. بۇدان كەيىن پلەي-وفف ماتچتارى وتەدى: 1/8 فينال – ناۋرىزدا, شيرەك فينال – ساۋىردە, جارتىلاي فينال – ءساۋىر سوڭىندا, ال شەشۋشى ويىن 30 مامىردا ۇيىمداستىرىلادى.
ەستەرىڭىزگە سالا كەتەيىك, «قايرات» بۇل كەزەڭگە دەيىن بىرقاتار قيىن قارسىلاستاردى جارىس جولىنان شىعاردى. الدىمەن سلوۆەنيالىق «وليمپيا» مەن فينليانديالىق كۋپس-ءتى, كەيىن سلوۆاكيالىق «سلوۆاندى» جەڭىپ, سوڭعى پلەي-وففتا شوتلانديالىق «سەلتيكتى» پەنالتي سەرياسىندا تىزە بۇكتىردى. وسىلايشا الماتىلىق كوماندا العاش رەت توپتىق كەزەڭگە جولداما الىپ وتىر.