تالعار قالاسىندا قازا تاپقان ءجاسوسپىرىم شەرزات بولاتتىڭ ەسىمىن كوشە اتاۋىنا بەرۋ ماسەلەسى كوتەرىلدى. مۇنداي ۇسىنىستى مارقۇمنىڭ وتباسى اتىنان ادۆوكات مەيىرمان شەكەەۆ ايتتى, دەپ جازادى Egemen.kz.
«شەرزاتتىڭ اتىمەن كوشە اتاڭىزدار. قان توگىلگەن, 16 جاسار بوزبالانىڭ ءومىرى قيىلعان جەردەگى كوشەلەر ءالى كۇنگە دەيىن مەندەلەەۆ پەن رۋستاۆەلي ەسىمىن يەلەنىپ تۇر. ولار تالعاردىڭ نەمەسە قازاقستاننىڭ دامۋىنا ۇلەس قوسقان تۇلعالار ەمەس. بۇل – كەڭەستىك كەزەڭنەن قالعان اتاۋلار. سوندىقتان مەن تالعار اكىمى ارىستانعا ۇسىنىس ءبىلدىرىپ, مەندەلەەۆ كوشەسىن شەرزاتتىڭ اتىنا بەرۋدى سۇرادىم», دەپ جازدى ادۆوكات Instagram پاراقشاسىندا.
ونىڭ ايتۋىنشا, قالا اكىمى ۇسىنىستى قاراستىرىپ, قولداۋ بىلدىرۋگە دايىن ەكەنىن جەتكىزگەن. شەكەەۆ كەيىننەن بۇل باستامانى نە سەبەپتى كوتەرگەنىن تولىق تۇسىندىرەتىنىن دە اتاپ ءوتتى.
ەسكە سالا كەتەيىك, شەرزات بولاتتىڭ ءولىمى 4 قازانعا قاراعان ءتۇنى ورىن الىپ, قوعامدا ۇلكەن رەزونانس تۋدىرعان ەدى. العاشىندا پوليتسيا بارلىق كۇدىكتىلەردىڭ ۇستالعانىن حابارلاعان, الايدا كەيىن مارقۇمنىڭ اتا-اناسى قىلمىسقا قاتىسقان وزگە ادامداردىڭ بوستاندىقتا جۇرگەنىن مالىمدەدى.
قازىرگى ۋاقىتتا بۇل ماسەلە جەرگىلىكتى بيلىك دەڭگەيىندە تالقىلانىپ جاتىر. اكىمدىكتىڭ رەسمي جاۋابى الداعى ۋاقىتتا بەلگىلى بولادى.