شەت اۋدانىنىڭ ەڭبەكشىل اۋىلىندا ەلگە قايتارىلعان زاڭسىز اكتيۆتەر ەسەبىنەن جاڭا مەديتسينالىق پۋنكت اشىلدى. زاماناۋي جابدىقتالعان نىسان 200-دەن استام تۇرعىنعا قىزمەت كورسەتىپ, شۇعىل جاعدايلاردا اۋداندىق اۋرۋحانانىڭ رەانيموبيل كولىگىن پايدالانۋعا مۇمكىندىك بەرەدى, دەپ حابارلايدى Egemen.kz.
بۇل نىسان مەملەكەت باسشىسىنىڭ اۋىلدىق جەرلەردەگى ينفراقۇرىلىمدى دامىتۋ جونىندەگى تاپسىرماسىن جۇزەگە اسىرۋ شەڭبەرىندە سالىنعان.
مەديتسينالىق پۋنكتتە دارىگەرگە دەيىنگى تەكسەرۋ, قاراۋ جانە ەمدىك كابينەتتەر جۇمىس ىستەيدى. بۇل شەت اۋدانىندا قايتارىلعان اكتيۆتەر ەسەبىنەن جۇزەگە اسىرىلىپ جاتقان جالعىز جوبا ەمەس. قازىرگى تاڭدا جىلاندى اۋىلىندا دا جاڭا مەديتسينالىق پۋنكتتىڭ قۇرىلىسى ءجۇرىپ جاتىر.
ۇكىمەتتىڭ ءباسپاسوز قىزمەتىنىڭ حابارلاۋىنشا, قاراعاندى وبلىسىندا ارناۋلى مەملەكەتتىك قوردان بولىنگەن قاراجاتقا جوسپارلانعان 51 مەديتسينالىق نىساننىڭ 24-ءى تۇرعىزىلىپ, 11-ءى پايدالانۋعا بەرىلگەن. قالعان 27 نىساننىڭ قۇرىلىسى جالعاسۋدا, ولاردىڭ بيىل قىركۇيەك ايىنىڭ سوڭىنا دەيىن تاپسىرۋى جوسپارلانعان.
جاڭا مەديتسينالىق نىساندار اشۋ پرەزيدەنت قاسىم-جومارت توقاەۆتىڭ باستاماسىمەن قابىلدانعان «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جۇرگىزىلىپ جاتىر. بۇگىنگى كۇنگە دەيىن جوسپارلانعان 655 جوبانىڭ 540-ى تولىق ىسكە اسقان.