مەملەكەت باسشىسى جولداۋدا ينۆەستيتسيا تارتۋ مەن ەلدىڭ ينۆەستيتسيالىق احۋالىن جاقسارتۋدىڭ ماڭىزدىلىعىن تاعى دا اتاپ ءوتتى. قازىرگى گەوساياسي تۇراقسىزدىق پەن الەمدىك ەكونوميكانىڭ ۇدەمەلى فراگمەنتاتسياسى جاعدايىندا بۇل مىندەت ەرەكشە مانگە يە.
ەل ءۇشىن بۇل تەك باسەكەگە قابىلەتتىلىكتى ساقتاپ قالۋ عانا ەمەس, سونىمەن قاتار ارتاراپتاندىرۋعا, يننوۆاتسيالارعا, ينستيتۋتسيونالدىق ورتانى دامىتۋعا نەگىزدەلگەن جاڭا دامۋ نۇكتەلەرىن قالىپتاستىرۋ قاجەتتىگىن بىلدىرەدى. 2025 جىلدىڭ ءبىرىنشى توقسانىنىڭ قورىتىندىسىندا ەل ەكونوميكاسىنا 6,6 ملرد دوللار ينۆەستيتسيا تارتىلدى. بۇل بىلتىرعى جىلدىڭ ءدال وسى كەزەڭىمەن سالىستىرعاندا 6,2%-عا ارتىق. جالپى العاندا, 2005 جىلدان بەرى ەلگە 424,3 ملرد دوللار كولەمىندە ينۆەستيتسيا تارتىلعان. سىرتقى سىن-قاتەرلەرگە قاراماستان, قازاقستان حالىقارالىق رەيتينگتەردە وڭ بەلگىلەر كورسەتىپ تە وتىر. ماسەلەن, S&P اگەنتتىگى ەلىمىزدىڭ جاعدايى بويىنشا بولجامدى «تۇراقتىدان» «پوزيتيۆتىگە» جاقسارتىپ, «BBB-» رەيتينگىن راستادى. سونىمەن قاتار «World Competitiveness Ranking 2025» رەيتينگىندە ءبىر ساتىعا كوتەرىلىپ, 34-ورىندى يەلەندىك.
جاھاندىق جانە وڭىرلىك ينۆەستيتسيالار ءۇشىن باسەكەلەستىك كۇشەيىپ جاتقان جاعدايدا ەلىمىز ينۆەستورلارعا ينستيتۋتسيونالدىق قولداۋدى ارتتىردى. وسى ماقساتتا ء«بىر تەرەزە» قاعيداتى بويىنشا جۇمىس ىستەيتىن ينۆەستيتسيالار تارتۋ كەڭەسى (ينۆەستيتسيالىق شتاب) قۇرىلدى. ونىڭ نەگىزگى مىندەتى – تۋىندايتىن ماسەلەلەردى جەدەل شەشۋ, جوبالاردى ىسكە اسىرۋدىڭ بارلىق كەزەڭىندە كومەكتەسۋ جانە جاڭا باستامالاردى جەدەل ىسكە قوسۋ. شتابتىڭ باستى ماقساتى – ەلدىڭ ينۆەستيتسيالىق تارتىمدىلىعىن ارتتىرۋ جانە وتاندىق ءارى شەتەلدىك كومپانيالار ءۇشىن قولايلى جاعداي جاساۋ. سونىمەن بىرگە مەملەكەت باسشىسى اكتيۆتەردى قايتارۋ كوميتەتىن ينۆەستورلاردىڭ قۇقىقتارىن قورعاۋ كوميتەتى دەپ قايتا اتاۋدى تاپسىردى.
ينۆەستيتسيالىق تارتىمدىلىقتى ودان ءارى ارتتىرۋ ماقساتىندا وتكەن جىلدىڭ قازان ايىندا 2029 جىلعا دەيىنگى ينۆەستيتسيالىق ساياسات تۇجىرىمداماسى بەكىتىلدى. بۇل ساياساتتىڭ نەگىزگى ماقساتتارى: نەگىزگى كاپيتالعا ينۆەستيتسيالاردى ءىجو-ءنىڭ 23%-ىنا دەيىن ۇلعايتۋ; سىرتقى ينۆەستيتسيالار ۇلەسىن 30%-عا دەيىن جەتكىزۋ; 150 ملرد دوللار تىكەلەي شەتەلدىك ينۆەستيتسيا تارتۋ. ينۆەستيتسيا تارتۋدىڭ جاڭا ءتاسىلى ەكونوميكانىڭ ناقتى سالالارىنىڭ قاجەتتىلىكتەرىن ەسكەرۋگە نەگىزدەلگەن. ينۆەستيتسيالارعا «تاپسىرىستار» وتاندىق بيزنەس پەن كۆازيمەملەكەتتىك كومپانيالاردىڭ سۇرانىسىنا قاراي قابىلدانباق. بۇل ينۆەستيتسيالىق ساياساتتىڭ نىسانالى باعىتى مەن تيىمدىلىگىن ارتتىرۋعا ءتيىس.
جالپى, قازاقستان ەىدۇ-نىڭ حالىقارالىق ينۆەستيتسيالار جانە كوپۇلتتى كاسىپورىندار تۋرالى دەكلاراتسياسىنىڭ قاعيداتتارىن ۇستانىپ كەلە جاتىر.
ەرلان جاقىپوۆ,
پرەزيدەنت جانىنداعى قسزي جاھاندىق ەكونوميكا جانە تۇراقتى دامۋ ءبولىمىنىڭ باسشىسى