قامشىبەك تاشيەۆتىڭ ءىسى سوتقا جولداندى: پروتسەسس جابىق وتەدى

ادۆوكات يكراميدين ايتكۋلوۆتىڭ مالىمەتىنشە, 12 مامىر كۇنى قىرعىزستاننىڭ باس پروكۋراتۋراسى تاشيەۆكە قاتىستى ايىپتاۋ اكتىسىن بەكىتكەن. بۇرىنعى شەنەۋنىككە بيلىكتى كۇشپەن باسىپ الۋعا دايىندالدى جانە قىزمەتتىك وكىلەتىن اسىرا پايدالاندى دەگەن ايىپ تاعىلىپ وتىر.

ءىس بىشكەكتىڭ پەرۆوماي اۋداندىق سوتىنا قاراۋعا جىبەرىلگەن. تاشيەۆپەن بىرگە تاعى جەتى ادام ايىپتالۋشى رەتىندە تىركەلدى.

قورعاۋشىنىڭ ايتۋىنشا, قىلمىستىق ءىس قۇپيالانعان. سوندىقتان سوت وتىرىستارى جابىق فورماتتا وتەدى جانە تەرگەۋ مەن سوت ماتەريالدارىن جاريالاۋعا تىيىم سالىنعان.

بۇعان دەيىن 29 ساۋىردە قامشىبەك تاشيەۆ قىلمىستىق كودەكستىڭ ەكى بابى بويىنشا ايىپتالعانى حابارلانعان ەدى. الايدا ول وزىنە تاعىلعان ايىپتاردى مويىنداماي, زاڭ اياسىندا قورعالاتىنىن مالىمدەدى.

قىرعىزستان مەدياسى بۇل تەرگەۋدى «75 ادامنىڭ حاتى» دەگەن وقيعامەن بايلانىستىرىپ وتىر. اقپاندا 75 ازامات پرەزيدەنت سادىر جاپاروۆ پەن پارلامەنت سپيكەرى نۇرلانبەك تۇرعىنبەك ۇلىنا اشىق ۇندەۋ جولداپ, ەلدە مەرزىمىنەن بۇرىن پرەزيدەنت سايلاۋىن وتكىزۋدى تالاپ ەتكەن.

وسىدان كەيىن, 10 اقپاندا سادىر جاپاروۆ ءوزىنىڭ ۇزاق جىلدار بويعى سەرىكتەسى بولعان قامشىبەك تاشيەۆتى قىزمەتىنەن بوساتتى. ول 2020 جىلدىڭ قازان ايىنان بەرى مينيسترلەر كابينەتىنىڭ توراعا ورىنباسارى جانە ۇقك توراعاسى قىزمەتتەرىن اتقارعان. ونىڭ ورنىنا كوميتەت باسشىسىنىڭ مىندەتىن ۋاقىتشا اتقارۋشى بولىپ جۇمعالبەك شابدانبەكوۆ تاعايىندالدى.