تابيعاتتى ايالاۋ – ۇرپاققا امانات. وسى ۇلى ۇستانىمدى ومىرلىك مۇرات ەتكەن جاقىپوۆتار اۋلەتى بۇگىندە مارقاكولدىڭ ماڭىن مەكەندەگەن جۇرتقا ەڭبەگىمەن دە, بىرلىگىمەن دە ۇلگى بولىپ وتىر. ۇلگىلى وتباسى كۇنى كەشە وبلىستىق «مەرەيلى وتباسى» بايقاۋىنىڭ جەڭىمپازى اتاندى.
شاڭىراعى شاتتىققا تولى ونەگەلى جان جانات سەيىتقالي ۇلى جاقىپوۆ شيرەك عاسىر بويى «مارقاكول مەملەكەتتىك تابيعي قورىعىندا» زەرتحاناشى قىزمەتىن ابىرويمەن اتقارىپ, بۇگىندە ءورت كۇزەتشىسى قىزمەتىندە ءجۇر. قىزمەتىنە دەگەن جاۋاپكەرشىلىگى مەن ادالدىعى ونى ارىپتەستەرىنىڭ عانا ەمەس, تۇتاس ءوڭىردىڭ سىيلى ازاماتىنا اينالدىردى. تابيعاتتى قورعاۋ ىسىنە قوسقان ەلەۋلى ەڭبەگى ءۇشىن 2018 جىلى ءىىى دارەجەلى, 2021 جىلى ءىى دارەجەلى «بيولوگيالىق الۋان تۇرلىلىكتى ساقتاۋ ىسىنە قوسقان ۇلەسى ءۇشىن» توسبەلگىسىمەن ماراپاتتالۋى سونىڭ ايعاعى.
– اكە-شەشەم دە وسى ءوڭىردىڭ تۋمالارى. ءوزىم تابان اۋدارماي ورمان سالاسىندا ەڭبەك ەتىپ كەلەمىن. تۋعان جەردىڭ تۇمسا تابيعاتىن قورعاۋ كاسىبي عانا ەمەس, پەرزەنتتىك تە پارىزىم, – دەيدى جانات سەيىتقالي ۇلى.
شاڭىراقتىڭ شۇعىلاسى, وتباسىنىڭ ۇيىتقىسى ساعىمجان سۇراۋقانقىزى التى بالانى تاربيەلەپ ءوسىرىپ, 2010 جىلى «كۇمىس القا» يەگەرى اتانعان ارداقتى انا. زەينەت جاسىنا جەتكەنشە ءوزى دە وسى قورىقتا ەڭبەك ەتىپ, كەيىنگى ۇرپاققا ىزگىلىك پەن ەڭبەكتىڭ ءمانىن ۇقتىرىپ كەلەدى. جاقىپوۆتار اۋلەتىنىڭ ءار پەرزەنتى اتا-اناسىنىڭ ءتالىمىن بويىنا ءسىڭىرىپ, ءتۇرلى سالادا ەلگە قىزمەت ەتىپ ءجۇر. ۇلكەن قىزدارى ءمادينا ءدامدى تاعام جاساۋدىڭ شەبەرى. ونىڭ قىزى ساميرا باستاۋىش سىنىپ مۇعالىمى, بالا جۇرەگىنە ءبىلىم ءدانىن سەۋىپ جۇرگەن جاس مامان.
انار جاناتقىزى بۋحگالتەرلىك ەسەپتى مەڭگەرىپ, قورىقتا بىرنەشە جىل ەڭبەك ەتتى. سالاماتتى ءومىر سالتىن سەرىك ەتكەن ول ۇلى ەرالىنىڭ سپورتتاعى جەتىستىكتەرىنە ۇنەمى دەم بەرىپ كەلەدى. جاس سپورتشى بۇگىندە بياتلوننان ەل چەمپيوناتىنىڭ جۇلدەگەرى.
شىرىن جاناتقىزى ەكى بالاسىنىڭ تاربيەسىنە ەرەكشە ءمان بەرىپ, وتباسىنىڭ بەرەكەسىن ارتتىرىپ وتىرعان اق جاۋلىقتى انا. كەنجە قىزى جاننا بولسا, ماتەماتيكا ءپانىنىڭ مۇعالىمى. وبلىستىق «التىن تۇعىر» بايقاۋىندا جۇلدەگەر اتانىپ, اۋدان كولەمىندە دە ۇزدىك ۇستاز رەتىندە تانىلعان. بۇگىندە ول دا كۇيەۋىمەن بىرگە تۋعان جەردىڭ تابيعاتىن قورعاۋعا ۇلەس قوسىپ ءجۇر.
ۇلدارى دا اۋلەت ابىرويىن اسىرىپ كەلەدى. ايان جانات ۇلى ءۇش بالانىڭ اكەسى, وتباسىنىڭ جاناشىرى. جارى ايزادا دا قورىقتا ەڭبەك ەتىپ, ەكولوگيالىق ءبىلىم بەرۋدى جولعا قويعان.
ءسۇت كەنجەلەرى سايان جانات ۇلى ىشكى ىستەر ورگاندارىندا شىڭدالعان ءتارتىپ ساقشىسى. قازىر قورىقتا شارۋاشىلىق ءىسىن باسقارادى. جۇبايى ديانا يحتيولوگ رەتىندە مارقاكولگە عانا ءتان مايقان بالىعىن قورعاۋمەن اينالىسادى.
جاقىپوۆتار اۋلەتى تەك ءبىر وتباسىنىڭ ەمەس, تۇتاس ءوڭىردىڭ ماقتانىشى. وتىز جەتى جىل بويى ءبىر اۋلەتتىڭ بىرنەشە مۇشەسى قاتارىنان قىزمەت ەتىپ كەلە جاتقان ەڭبەك ديناستياسى تابيعاتتى ايالاۋ ىسىمەن تاعدىرلارىن توعىستىرعان.
43 جىل وتاسقان جانات اعا مەن ساعىمجان اپايدىڭ ەڭ ۇلكەن جەتىستىگى – بالالارىنا ادالدىقتى, ەڭبەكقورلىقتى, تۋعان جەرگە دەگەن سۇيىسپەنشىلىكتى ۇيرەتۋى. قاراپ وتىرساق, ولاردىڭ شاڭىراعى – بىرلىكتىڭ, ەڭبەكتىڭ, تۋعان جەرگە دەگەن قالتقىسىز ماحابباتتىڭ ايقىن كورىنىسى. تابيعاتتى قورعاۋ ءىسىن ۇرپاقتان-ۇرپاققا جالعاپ كەلە جاتقان اۋلەت ەلگە, وتانعا ادال قىزمەت ەتۋدىڭ جارقىن ۇلگىسى.
شىعىس قازاقستان وبلىسى,
مارقاكول اۋدانى