2 ءساۋىر دۇنيەجۇزى بويىنشا حالىقارالىق بالالار كىتابى كۇنى اتالىپ وتەدى. ايتۋلى كۇن جاس ۇرپاقتىڭ كىتاپ وقۋعا دەگەن قىزىعۋشىلىعىن ارتتىرىپ, ولاردىڭ رۋحاني دامۋىنىڭ ماڭىزدىلىعىن ايقىندايدى, دەپ جازادى Egemen.kz.
مادەنيەت جانە اقپارات مينيسترلىگىنىڭ مالىمەتىنشە, بۇگىندە قازاقستاندا 3889 كوپشىلىككە قولجەتىمدى كىتاپحانا جۇمىس ىستەيدى, ونىڭ ىشىندە 272-ءسى – بالالار كىتاپحاناسى. ولاردىڭ كىتاپ قورى 7 ميلليوننان استام دانانى قۇرايدى, ال وقىرماندار سانى 1,7 ميلليوننان اسا بالانى قامتيدى.
ەڭ كوپ سۇرانىسقا يە شىعارمالاردىڭ قاتارىندا بەردىبەك سوقپاقباەۆتىڭ «مەنىڭ اتىم قوجا» جانە «بالالىق شاققا ساياحات», سايىن مۇراتبەكوۆتىڭ «جابايى الما» جانە «جۋسان ءيىسى», سونداي-اق انتۋان دە سەنت-ەكزيۋپەريدىڭ «كىشكەنتاي حانزادا» ەڭبەكتەرى بار.
مادەنيەت جانە اقپارات مينيسترلىگى جىل سايىن ماقساتتى اۋديتورياعا ارنالعان كىتاپتاردى شىعارىپ, ولاردى ەل كىتاپحانالارىنا تاراتادى. 2020–2025 جىلدارى 396 مىڭ دانا تارالىممەن 132 كىتاپ جارىق كوردى.
2026 جىلى بالالار مەن جاسوسپىرىمدەرگە ارنالعان 42 مىڭ دانا كىتاپ شىعارىپ, كىتاپحانالارعا جەتكىزۋ جوسپارلانىپ وتىر. ادەبيەتتىڭ قولجەتىمدىلىگىن ارتتىرۋ ماقساتىندا ەلەكتروندى نۇسقالارى قازاقستان ۇلتتىق ەلەكتروندىق كىتاپحاناسىنىڭ پورتالىندا ورنالاستىرىلادى.
بالالار ادەبيەتى سالاسىنىڭ دامۋىنا ادەبي سىيلىقتار مەن بايقاۋلار دا ايتارلىقتاي ۇلەس قوسۋدا. اتاپ ايتقاندا, «ايبوز» ۇلتتىق سىيلىعى جانە پرەزيدەنتتىك ادەبي سىيلىق اياسىندا بالالار ادەبيەتى بويىنشا نوميناتسيالار قاراستىرىلعان. ەلىمىزدە 2025 جىلدان باستاپ ۇلتتىق كىتاپ كۇنى اتالىپ وتەدى. ونىڭ اياسىندا بالالار باسىلىمدارىنا ارنالعان ارنايى ساناتتاردى قامتي وتىرىپ, «ۇلتتىق كىتاپ» بايقاۋى وتكىزىلەدى.