شىمكەنتتە وتكەن «ۋچاسكە» جەدەل-پروفيلاكتيكالىق ءىس-شاراسى كەزىندە پوليتسيا قىزمەتكەرلەرى قارۋ يەلەرىنىڭ تۇرعىلىقتى جەرلەرىن تەكسەرىپ, بىرقاتار زاڭبۇزۋشىلىقتاردى انىقتادى, دەپ حابارلايدى Egemen.kz.
«ۋچاسكە» جەدەل-پروفيلاكتيكالىق ءىس-شاراسى اياسىندا پوليتسيا قىزمەتكەرلەرى قارۋ يەلەرىنىڭ تۇرعىلىقتى جەرلەرىندە تەكسەرىس جۇرگىزدى. شارانىڭ نەگىزگى ماقساتى – قارۋدى ساقتاۋ جانە تىركەۋ ءتارتىبىن باقىلاۋ, زاڭ بۇزۋشىلىقتاردى انىقتاۋ جانە ولاردىڭ الدىن الۋ.
تەكسەرۋ بارىسىندا بىرقاتار زاڭ تالاپتارىنىڭ بۇزىلعانى بەلگىلى بولدى. اتاپ ايتقاندا, قارۋدى دۇرىس ساقتاماۋ جانە تىركەۋ مەرزىمىن وتكىزىپ الۋ دەرەكتەرى تىركەلدى. ناتيجەسىندە 73 تۇرعىننىڭ قارۋدى ساقتاۋعا بەرىلگەن رۇقسات مەرزىمى ءوتىپ كەتكەنى انىقتالدى. قۇقىق بۇزۋشىلارعا قاتىستى اكىمشىلىك حاتتامالار تولتىرىلدى.
پوليتسيا دەپارتامەنتى ازاماتتاردى قارۋ اينالىمىنا قاتىستى زاڭنامانى قاتاڭ ساقتاۋعا شاقىرادى. قوعامدىق قاۋىپسىزدىكتى قامتاماسىز ەتۋ جانە «زاڭ مەن ءتارتىپ» قاعيداتىن ىلگەرىلەتۋ ماقساتىندا مۇنداي پروفيلاكتيكالىق شارالار الداعى ۋاقىتتا دا تۇراقتى تۇردە جۇرگىزىلەدى.