بيىل 18 شىلدەدە مەملەكەت باسشىسى جاڭا سالىق كودەكسىنە قول قويدى. ەندى بجزق-دان بەيرەزيدەنتتەرگە تولەنەتىن زەينەتاقى تولەمدەرىن قوسپاعاندا, بارلىق تابىستار, تۇرعىن ۇيگە نەمەسە ەمدەلۋگە ارنالعان بىرجولعى زەينەتاقى تولەمدەرى (بزت) تۇرىندەگى كىرىستەر 2026 جىلعى 1 قاڭتاردان باستاپ جەكە تابىس سالىعىنان (جتس) بوساتىلادى.
بۇعان دەيىن قولدانىستاعى سالىق كودەكسىنە سايكەس, بىرىڭعاي جيناقتاۋشى زەينەتاقى قورىنان (بجزق) تولەنەتىن بىرجولعى زەينەتاقى تولەمدەرى 10% مولشەرلەمەمەن جەكە تابىس سالىعى (جتس) ۇستالاتىن كىرىس ءتۇرى سانالدى. ياعني زەينەتاقى جارنالارى جەكە زەينەتاقى شوتتارىنا سالىق سالىنعانعا دەيىن اۋدارىلادى. جەكە تابىس سالىعى تولەمدەر جۇزەگە اسىرىلعان كەزدە ۇستالادى. جتس ۇستاۋ مىندەتتى زەينەتاقى جارنالارى (مزج), مىندەتتى كاسىپتىك زەينەتاقى جارنالارى (مكزج), ەرىكتى زەينەتاقى جارنالارى (ەزج) ەسەبىنەن بارلىق زەينەتاقى تولەمدەرىنە جيىنتىق تۇردە جۇرگىزىلەدى. بۇل رەتتە تۇزەتۋلەر مەن سالىقتىق شەگەرىمدەر ەسكەرىلەدى.
تۇرعىن ۇيگە نە بولماسا ەمدەلۋگە بىرجولعى زەينەتاقى تولەمدەرىن پايدالانعان كەزدە جتس ۇستاۋ دا كوزدەلەدى. الۋشىنىڭ تاڭداۋىنا ونى ۇستاپ قالۋدىڭ ەكى جولى ۇسىنىلادى: بزت العان كەزدە بىردەن نەمەسە زەينەتاقى الاتىن كەزگە دەيىن كەيىنگە قالدىرۋدى تاڭداۋعا بولادى.
2026 جىلعى 1 قاڭتارعا دەيىن بجزق-دان بەرىلەتىن زەينەتاقى مەن بىرجولعى زەينەتاقى تولەمدەرىنەن جتس ەسەپتەۋ, شەگەرىپ قالۋ, تولەۋ قولدانىستاعى تارتىپپەن جۇزەگە اسىرىلادى.
كەلەسى جىلدىڭ 1 قاڭتارىنان جتس زەينەتاقى تولەمدەرىنىڭ بارلىق تۇرلەرىنەن ۇستالمايدى. بىراق مۇنىڭ ەلىمىزدىڭ رەزيدەنتى بولىپ ەسەپتەلمەيتىن ازاماتتارعا قاتىسى جوق. سونداي-اق جتس بىرجولعى زەينەتاقى تولەمدەرىنەن دە ۇستالمايدى.
كەلەر جىلدىڭ 1 قاڭتارىنان باستاپ تۇرعىن ءۇي جاعدايىن جاقسارتۋ نەمەسە ەمدەلۋ ماقساتىندا پايدالانىلعان بىرجولعى زەينەتاقى تولەمدەرىنەن ۇستالۋعا ءتيىس, بىراق زەينەتكە شىققانعا دەيىن كەيىنگە قالدىرىلعان جەكە تابىس سالىعى بويىنشا ەسەپتەلگەن مىندەتتەمەلەر دە جويىلادى. الايدا بۇعان دەيىن بيۋدجەتكە تولەنگەن سالىقتار قايتارىلمايدى.