تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن جۇمىس كەڭەسى ءوتىپ, جيىندا ەستۋ قابىلەتى بۇزىلعان بالالارعا ارنالعان سپورت سەكتسيالارىنىڭ سانىن ارتتىرۋ تاپسىرىلدى. بۇل شارا ەلىمىزدە سۋردليمپيالىق سپورت رەزەرۆىن جۇيەلى تۇردە دايىنداۋعا جانە وسى باعىتتىڭ تۇراقتى دامۋ ۇلگىسىن قالىپتاستىرۋعا مۇمكىندىك بەرەدى, دەپ جازادى Egemen.kz.
سونىمەن قاتار باسقوسۋدا بيىلعى 15–25 قاراشا كۇندەرى جاپونيانىڭ توكيو قالاسىندا وتەتىن XXV سۋردليمپياداعا ۇلتتىق قۇرامانىڭ دايىندىعى تالقىلاندى. اتالعان جارىسقا 80 ەلدەن 3 مىڭنان استام سپورتشى قاتىسادى دەپ كۇتىلۋدە. قازاقستان ۇلتتىق قۇراماسى 8 سپورت ءتۇرى بويىنشا قاتىسپاق. قازىرگى تاڭدا كوماندا 11 وقۋ-جاتتىعۋ جيىنىن وتكىزىپ, سپورتتىق تاماقپەن, دارۋمەندەرمەن تولىق قامتاماسىز ەتىلدى, سپورتتىق كيىم-كەشەك پەن ارنايى قۇرال-جابدىقتار ساتىپ الىندى. سونىمەن بىرگە ءاربىر سپورتشىنىڭ فيزيكالىق دايىندىعى مەن جاعدايىنا تالداۋ جاسالىپ, ىقتيمال قارسىلاستار انىقتالدى.
«مەملەكەت باسشىسى ينكليۋزيۆتىلىككە, سپورتتى دامىتۋعا ايرىقشا كوڭىل ءبولىپ كەلەدى. بيىل ءبىز العاش رەت «مۇگەدەكتىگى بار سپورتشىنى سۇيەمەلدەۋشى» ۇعىمىن زاڭ جۇزىندە بەكىتتىك. بۇگىندە ەلىمىزدە 19 پاراليمپيالىق سپورت ءتۇرى بەلسەندى دامىپ كەلەدى, جىل سايىن 800-دەن استام جارىس وتكىزىلەدى. سۋردليمپياداعا دايىندىق بويىنشا مەملەكەت ءوز مىندەتتەمەلەرىن تولىق ورىندادى. دايىندىقتىڭ جەكەلەگەن ماسەلەلەرى بويىنشا قىسقا مەرزىمدە شەشىم قابىلداۋدى تاپسىرامىن», دەدى مينيستر.سونداي-اق مينيستر حالىقارالىق تاجىريبەنى ەسكەرە وتىرىپ, سۋردليمپيالىق سپورت تۇرلەرىن دامىتۋدىڭ جول كارتاسىن ازىرلەۋ, عىلىمي نەگىزدەردى ەنگىزۋ, اسىرەسە بالالار مەن جاسوسپىرىمدەر سپورتىن دامىتۋ قاجەتىن اتاپ ءوتتى.