الەمگە ايگىلى Boxrec.com سايتى ەلىمىزدىڭ ەڭ ۇزدىك كاسىپقوي بوكسشىلارىنىڭ رەيتينگىن جاريالادى. مىقتىلار كوشىن جانىبەك ءالىمحان ۇلى باستاپ تۇر.
وعان ەش تاڭدانۋعا بولماس. سەبەبى 32 جاستاعى جانىبەك قازىرگى كەزدەگى تولىققاندى نۇسقالار بويىنشا ەلىمىزدەگى جالعىز الەم چەمپيونى. ورتا سالماقتا جۇدىرىقتاسىپ جۇرگەن ول كاسىپقوي رينگتە 17 جەكپە-جەك وتكىزىپ, بارلىعىندا جەڭىسكە جەتتى. 12 قارسىلاسىن نوكاۋتقا جىبەردى. جەتىسۋ وبلىسى, الاكول اۋدانىنىڭ تۋماسى 2022 جىلى WBO, 2023 جىلى IBF نۇسقاسىنىڭ تەڭدەسسىزى دەپ تانىلىپ, سول اتاقتارىن بىرنەشە مارتە ءساتتى قورعادى. سوندىقتان دا ءالىمحان ۇلىنىڭ كوش باسىندا تۇرۋى زاڭدىلىق.
ەكىنشى ورىندا – ەكىنشى جارتىلاي جەڭىل سالماقتاعى سۇلتان زاۋىربەك. 29 جاستاعى تۇركىستاننىڭ تارلانى 20 باسەكەنىڭ بىردە-بىرەۋىندە ۇتىلعان جوق. 13 جەكپە-جەكتە قارسىلاستارىن ۇرىپ جىقتى. ءتۇرلى ورتاڭقول نۇسقالار بويىنشا التىن بەلبەۋدىڭ يەگەرى, WBA رەيتينگىندە ءۇشىنشى ورىندا تۇر.
ۇزدىك ۇشتىكتى بەكمان سويلىباەۆ تۇيىندەدى. ول دا ەكىنشى جارتىلاي جەڭىل سالماقتا ونەر كورسەتەدى. 34 جاستاعى تاجىريبەلى قازاق بوكسشىسى 21 كەزدەسۋىنىڭ تەك بىرەۋىندە ۇتىلدى. بەكمان ءوز جەڭىستەرىنىڭ تەڭ جارتىسىنان استامىنا نوكاۋتپەن قول جەتكىزدى. سونداي-اق توپ-10-دىقتا دانيار ەلەۋسىنوۆ (12-0, 7 كو), باتىر جۇكەمباەۆ (24-1, 17 كو), بەك نۇرماعانبەت (14-0, 12 كو), ەلشات نىگمەتوللا (21-0-2, 8 كو), سادريددين احمەدوۆ (15-0-1, 13 كو), رۋسلان ماديەۆ (17-2-1, 6 كو), سەرگەي ليپينەتس (18-4-1, 13 كو) سىندى ساڭلاقتار بار.