ءماجىلىس قازاقستان مەن كاتار ۇكىمەتتەرى اراسىنداعى قازاقستاننان كەلگەن جۇمىسكەرلەردى كاتاردا جۇمىسقا ورنالاستىرۋدى رەتتەۋ جونىندەگى كەلىسىمدى راتيفيكاتسيالادى. كەلىسىمگە 2024 جىلعى 14 اقپاندا دوحا قالاسىندا قول قويىلعان, دەپ حابارلايدى Egemen.kz.
قۇجات قازاقستان ازاماتتارىن كاتاردا زاڭدى تۇردە جۇمىسقا ورنالاستىرۋعا جانە ولاردىڭ قۇقىقتارىن قورعاۋعا مۇمكىندىك بەرەدى.
كەلىسىمگە جانە ستاندارتتى ەڭبەك شارتىنا سايكەس كاتار جۇمىس بەرۋشىلەرى قازاقستاندىقتارعا مىنا قىزمەتتەردى قامتاماسىز ەتۋگە مىندەتتى:
– قازاقستاننان كاتارعا جانە كەرى قاراي ۇشۋ بيلەتتەرىن تولەۋ;
– جيھازبەن جابدىقتالعان تۇرعىن ءۇي (نەمەسە جاردەماقى);
– تۇرعىلىقتى جەرىنەن جۇمىسقا تاسىمالداۋ (نەمەسە كولىك شىعىندارىن وتەۋ).
– كەمىندە 3 اپتالىق جىل سايىنعى ەڭبەك دەمالىسى, سونداي-اق قوسىمشا 3 كۇندىك ەڭبەك دەمالىسى.
ەگەر ەڭبەك شارتى بۇزىلسا, داۋلار مەن توتەنشە جاعدايلار ورىن سالسا, قازاقستان ازاماتتارىن قايتارۋ ەرەجەلەرى بەلگىلەنەدى.
كەلىسىمدى جۇزەگە اسىرۋ, جۇمىسقا ورنالاسۋ مۇمكىندىكتەرىن قاراستىرۋ جانە اقپارات الماسۋ, سونداي-اق داۋلاردى شەشۋ بويىنشا ارەكەتتەردى ۇيلەستىرۋ ءۇشىن ءار تاراپتان ءۇش وكىلدەن تۇراتىن بىرلەسكەن كوميتەت قۇرىلادى.
كەلىسىمدى ىسكە اسىرۋ بويىنشا ۋاكىلەتتى ورگاندار قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى مەن كاتار مەملەكەتىنىڭ ەڭبەك مينيسترلىگى بولادى.
قازاقستان رەسپۋبليكاسى سىرتقى ىستەر مينيسترلىگىنىڭ مالىمەتىنشە, جىل باسىنان بەرى كاتار اۋماعىندا قازاقستاننىڭ 710 ازاماتى رەسمي تۇردە جۇمىس ىستەيدى.