ءماجىلىس دەپۋتاتى دانيار قاسقاراۋوۆ پرەمەر-مينيستر ولجاس بەكتەنوۆكە جولداعان دەپۋتاتتىق ساۋالىندا الماتى وبلىسىنداعى سوربۇلاق كارىز سۋى جينالاتىن كولىنىڭ ماسەلەسىن ۇكىمەتتىڭ ەرەكشە باقىلاۋىنا الۋدى سۇرادى, دەپ جازادى Egemen.kz.
دەپۋتاتتىڭ ايتۋىنشا, سوربۇلاق 37 جىلدان بەرى ىلە اۋدانى تۇرعىندارىنىڭ باستى پروبلەماسىنا اينالعان. جاز ايلارىندا كولدەن تارايتىن جاعىمسىز ءيىس حالىقتىڭ تىنىسىن تارىلتىپ وتىر.
بيىل شىلدە ايىندا جۇرگىزىلگەن زەرتحانالىق تەكسەرىستەر سوربۇلاق سۋىندا 31 ءتۇرلى حيميالىق زاتتار مەن اۋىر مەتالداردىڭ بار ەكەنىن كورسەتكەن. اسىرەسە كادميدىڭ مولشەرى قالىپتى نورمادان ءتورت ەسە كوپ ەكەنى انىقتالعان. «بۇل – وكپە, بۇيرەك, جۇيكە جۇيەسىن زاقىمداپ, ونكولوگيالىق اۋرۋ تۋعىزۋى مۇمكىن اسا قاۋىپتى ۋ. دەمەك, سوربۇلاق ماڭىنداعى تۇرعىنداردىڭ دەنساۋلىعىنا ناقتى قاۋىپ بار», – دەدى دەپۋتات.
سونىمەن قاتار, كولدەگى كارىز سۋىنىڭ كولەمى 750 ملن تەكشە مەترگە جەتكەن. ەكولوگتاردىڭ بولجامىنشا, نوسەرلى جاۋىن نەمەسە جەر سىلكىنىسى جاعدايىندا سوربۇلاق ارناسىنان اسىپ, اقشي مەن كۇرتى اۋىلدارىن باسىپ قالۋى مۇمكىن. مۇنداي جاعدايدا لاس سۋ ىلە, بالقاش پەن قاپشاعايعا دا تارالۋ قاۋپى بار. دەپۋتات 1988 جىلى جامانقۇم بوگەتىنىڭ بۇزىلۋىنان 13 ادامنىڭ قازا تاپقانىن ەسكە سالدى.
حالىق قالاۋلىسى ۇكىمەتكە تومەندەگىدەي ۇسىنىستارىن جەتكىزدى:
سوربۇلاق سۋىنىڭ قۇرامىن, دەڭگەيىن جانە قاۋىپتىلىگىن تەكسەرەتىن مەملەكەتتىك كوميسسيا قۇرۋ;
رەسپۋبليكالىق بيۋدجەتتەن قارجى ءبولىپ, زاماناۋي كارىز سۋلارىن تازارتۋ ستانتسيالارىن سالۋ;
بۇعان دەيىن بولىنگەن قاراجاتتىڭ ماقساتتى جۇمسالۋىن انىقتاۋ ءۇشىن مەملەكەتتىك اۋديت جۇرگىزۋ;
سۋدى ءتيىمدى پايدالانۋ ءۇشىن ارنايى جوبا دايىنداپ, ونى اۋىل شارۋاشىلىعىنا باعىتتاۋ.
«بۇل – تەك ىلە اۋدانىنىڭ ەمەس, بۇكىل جەتىسۋ ءوڭىرىنىڭ قاۋىپسىزدىگىنە قاتىستى ماسەلە. سوندىقتان سوربۇلاق پروبلەماسىن ۇكىمەتتىڭ ەرەكشە باقىلاۋىنا الۋدى سۇرايمىن», – دەدى ءماجىلىس دەپۋتاتى.