جاقىندا «Egemen Qazaqstan» گازەتىندە «مەرگەندەر كۆاندجۋدا جينالدى» (05.09.2005 جىل) دەگەن ماقالا جارىق كوردى. وندا ساداق اتۋدان وتكەن الەم چەمپيوناتتارى تاريحىندا ەلىمىزدىڭ مەرگەندەرى ءبىر عانا مەدال العانىنا قىنجىلىس بىلدىرگەن ەدىك.
جوعارىدا اتالعان جۇلدەگە حح عاسىردىڭ توقسانىنشى جىلدارى قول جەتكىزدىك. 1993 جىلى تۇركيانىڭ انتاليا قالاسىندا ۇيىمداستىرىلعان بايراقتى باسەكەنىڭ كلاسسيكالىق ساداق اتۋشىلار سايىسىندا يانا تۋنيانتس ۇزدىك ۇشتىكتى تۇيىندەدى. سودان بەرى باقانداي 15 جارىسقا قاتىسقانىمىزبەن, قانجىعامىز ءبىر مايلانباي-اق قويدى. مىنە, ەندى ارادا 32 جىل وتكەن سوڭ, قازاق جانكۇيەرلەرى مەدالدىڭ سىڭعىرىن ەستىدى. وڭتۇستىك كورەيانىڭ كۆاندجۋ قالاسىندا جالاۋى جەلبىرەگەن الەم چەمپيوناتىندا بلوكتىق ساداق اتۋدان قۇرامىندا ادەل جەكسەنبينوۆا, ۆيكتوريا ليان, روكسانا يۋنۋسوۆا سىندى ساداقشىلارى بار ءبىزدىڭ كوماندا قولا مەدال يەلەندى. باستاپقى باسەكەلەردە پولشا (229:227), ەستونيا (230:226), يتاليانى (228:227) ۇتقان جەرلەستەرىمىز جارتىلاي فينالدا ءدال وسى دودانىڭ ءۇش دۇركىن كۇمىس جۇلدەگەرى مەكسيكامەن كەزدەستى. نەگىزگى ۋاقىت 231:231 ەسەبىمەن تەڭ اياقتالدى. قوسىمشا ۋاقىتتا اتستەكتەردىڭ باعى جاندى – 30:29.
مەرگەندەرىمىز ءۇشىنشى ورىن ءۇشىن تارتىستا ۇلىبريتانيامەن شەبەرلىك بايقاستى. جالپى, جەر-جاھاننىڭ مىقتىلارى جينالعان جارىستا تۇماندى البيون ەلىنىڭ وكىلدەرى 54 (9 التىن + 18 كۇمىس + 27 قولا) مارتە جەڭىس تۇعىرىنا كوتەرىلدى. سىن ساعاتتا وسىنداي اسا ازۋلى كوماندانى وتانداستارىمىز اۋىزدىقتاي الدى. اسا شيەلەنىستى وتكەن باسەكە 232:229 ەسەبىمەن ءبىزدىڭ شەبەرلەردىڭ پايداسىنا شەشىلدى.