پرەزيدەنتتىڭ 2025 جىلعى جولداۋىن جۇزەگە اسىرۋ جونىندەگى شارالارعا ارنالعان ۇكىمەت وتىرىسىندا پرەمەر-مينيستر ولجاس بەكتەنوۆ جاڭا ينۆەستيتسيالىق كەزەڭدى باستاۋ قاجەتتىگىن اتاپ ءوتتى, دەپ حابارلايدى Egemen.kz.
«پرەزيدەنت جولداۋدا جاڭا يننوۆاتسيالىق جانە ينفراقۇرىلىمدىق وزگەرىستەردى ايقىنداپ بەردى. قويىلعان مىندەتتەردى شەشۋ ءۇشىن, ەڭ الدىمەن, ەلىمىزگە تارتىلاتىن ينۆەستيتسيالار اعىنىن ارتتىرۋ قاجەت. مەملەكەت باسشىسى جاڭا ينۆەستيتسيالىق كەزەڭدى باستاۋ قاجەتتىگىن اتاپ ءوتتى. سوندىقتان ءبىز وتە قىسقا مەرزىمدە ينۆەستورلارمەن بىرىڭعاي ءوزارا ءىس-قيمىل تەتىگىن قۇرىپ, ينۆەستيتسيا تارتۋ جۇيەسىن تۇبەگەيلى جاڭارتۋعا ءتيىسپىز», دەدى ولجاس بەكتەنوۆ.
پرەمەر-مينيستر اتاپ وتكەندەي, ينۆەستيتسيالار اياسىندا تارتىلعان ءاربىر تەڭگە نورماتيۆتىك اكتىلەرمەن جانە وڭتايلى تاجىريبەمەن بەكىتىلگەن مىقتى كەپىلدىكتەرمەن قورعالۋعا ءتيىس. سونىمەن قاتار جاساندى ينتەللەكت (جي) تەحنولوگيالارىن قولدانۋ ينۆەستيتسيالاردى بارىنشا ءتيىمدى پايدالاناتىن سالالاردى ايقىنداۋعا جانە ولاردىڭ پراكتيكالىق تاجىريبەسىن ەكونوميكانىڭ باسقا سالالارىنا تاراتۋعا مۇمكىندىك بەرەدى.
سونداي-اق ەكونوميكانىڭ جوعارى تەحنولوگيالىق سالالارىنا ينۆەستيتسيا تارتۋ ءۇشىن ارنايى ءىس-شارالار, ونىڭ ىشىندە پرەفەرەنتسيالار قاراستىرىلۋى قاجەت. پرەمەر-مينيستر بۇل شارالاردىڭ مەملەكەت باسشىسىنىڭ تاپسىرماسى بويىنشا ازىرلەنىپ جاتقان ءتيىستى باعدارلاماعا نەگىز بولاتىنىن اتاپ ءوتتى.