جەتىسۋ وبلىسى اكىمدىگىنىڭ قولداۋىمەن ب.ريموۆا اتىنداعى تالدىقورعان دراما تەاترى 12 قىركۇيەكتە 50 جىلدىق مەرەيتويىن اتاپ وتپەك. مەرەيتوي اياسىندا قازاق تەاتر ونەرىنىڭ دارا تۇلعاسى, حالىق ءارتىسى, كسرو جانە قازاقستاننىڭ مەملەكەتتىك سىيلىعىنىڭ لاۋرەاتى, قىرعىزستاننىڭ ەڭبەك سىڭىرگەن مادەنيەت قايراتكەرى بيكەن ريموۆا اتىنداعى «Biken» ءىىى حالىقارالىق تەاتر فەستيۆالى ۇيىمداستىرىلادى.
بۇل ونەر مەرەكەسىنىڭ نەگىزگى ماقساتى – تەاتر ۇجىمدارى اراسىنداعى شىعارماشىلىق بايلانىستى ارتتىرۋ, كاسىبي ىنتىماقتاستىقتى دامىتۋ. سونىمەن قاتار فەستيۆال قازاق مادەنيەتىندە وشپەس ءىز قالدىرعان بيكەن ريموۆانىڭ ەسىمىن ماڭگى ەستە قالدىرۋعا باعىتتالعان. ۇيىمداستىرۋشىلاردىڭ ايتۋىنا قاراعاندا, اتالعان ءىس-شارا جاس رەجيسسەرلەر مەن اكتەرلەردىڭ, دراماتۋرگتەر مەن سۋرەتشىلەردىڭ جاڭا بۋىنىن قولداپ, ولاردىڭ كاسىبي دامۋىنا سەرپىن بەرەدى.
حالىقارالىق دەڭگەيدەگى فەستيۆال 12–17 قىركۇيەك ارالىعىندا تالدىقورعاندا وتەدى. ءۇشىنشى رەت جالاۋىن كوتەرگەلى وتىرعان ونەر دوداسىنا گرۋزيا, قىرعىزستان, وزبەكستان جانە ەلىمىزدىڭ تۇكپىر-تۇكپىرىنەن كەلگەن توعىز تەاتر ۇجىمى قاتىسادى. بۇل قاتىسۋشىلار شىعارماشىلىق ىزدەنىستەرى مەن تىڭ قويىلىمدارىن كوپشىلىك نازارىنا ۇسىنباق.
فەستيۆالدىڭ سىنشىلار القاسىندا ەلگە تانىمال ونەر قايراتكەرلەرى بار. ولاردىڭ قاتارىندا مەملەكەتتىك سىيلىقتىڭ لاۋرەاتى, قىرعىز رەسپۋبليكاسىنىڭ ەڭبەك سىڭىرگەن ءارتىسى, رەجيسسەر ءارى پروديۋسەر دوسحان جولجاقسىنوۆ, تەاترتانۋشى, ونەرتانۋ كانديداتى, قازاق ۇلتتىق ونەر اكادەمياسىنىڭ پروفەسسورى مەرۋەرت جاقسىلىقوۆا, قازاقستاننىڭ حالىق ءارتىسى, رەجيسسەر-دراماتۋرگ تالعات تەمەنوۆ, بەلگىلى تەاترتانۋشى, تاتارستان رەسپۋبليكاسى مادەنيەت ءمينيسترىنىڭ كەڭەسشىسى نياز يگلاموۆ, شوتا رۋستاۆەلي اتىنداعى تبيليسي مەملەكەتتىك تەاتر جانە كينو ۋنيۆەرسيتەتىنىڭ پروفەسسورى, ونەرتانۋ دوكتورى گيورگي تسكيتيشۆيلي بار.
مەرەيتوي اياسىندا وتەتىن بۇل فەستيۆال ەلىمىزدە تەاتر ونەرىنىڭ دامۋىنا جاڭا سەرپىن بەرىپ, حالىقارالىق دەڭگەيدەگى شىعارماشىلىق بايلانىستى نىعايتۋعا ىقپال ەتپەك.