مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا سۋ رەسۋرستارىن ساقتاۋ جانە كاسپي تەڭىزىنىڭ تارتىلۋىنا بايلانىستى الاڭداۋشىلىقتى اتاپ ءوتتى. پرەزيدەنتتىڭ ايتۋىنشا, سۋ تاپشىلىعى ماسەلەسىن كەشەندى شەشۋ – ۇلتتىق قاۋىپسىزدىكپەن قاتار, وڭىرلىك تۇراقتىلىقتىڭ دا كەپىلى, دەپ جازادى Egemen.kz.
پرەزيدەنت سۋ ۇنەمدەيتىن تەحنولوگيالاردى ەنگىزۋ جۇمىسىنىڭ باياۋ ءجۇرىپ جاتقانىن سىنعا الدى.
«بۇل جۇمىسقا بەلگىلى شەتەلدىك كومپانيالاردى تارتقان ءجون. سونداي-اق قىتايدا جاسالعان الەمدەگى ەڭ وزىق تەحنولوگيالاردى ساتىپ الۋعا بولادى. ال ديقاندار سۋدى كوپ قاجەت ەتەتىن داقىلداردى ازايتپاي وتىر. ءتىپتى ەگىن سۋارۋعا قاجەتتى سۋدى ەش رۇقساتسىز بۇرىپ الۋ جايتتارى ءجيى كەزدەسەدى. سونىمەن بىرگە “قارا نارىقتاعى” سۋدى زاڭسىز ساتۋ ماسەلەسىن قۇقىق قورعاۋ ورگاندارى ءجىتى باقىلاۋى قاجەت», – دەدى مەملەكەت باسشىسى.
پرەزيدەنت ارال تەڭىزىنىڭ مىسالىن كەلتىرىپ, جۇيەلى جۇمىس جۇرگىزىلگەن جاعدايدا وڭ ناتيجە بولاتىنىن اتاپ ءوتتى.
«سولتۇستىك ارالدى ساقتاپ قالدىق. ايدىنى 36 پايىزعا ۇلعايىپ, سۋ كولەمى ەكى ەسە ءوستى. تۇز مولشەرى ەكى ەسە ازايدى. بىراق ارالدى تولتىرۋ جۇمىستارى جالعاسا بەرۋى ءتيىس», – دەدى قاسىم-جومارت توقاەۆ.
كاسپي تەڭىزىنىڭ تارتىلۋى حالىقتى الاڭداتقانىن ايتقان مەملەكەت باسشىسى ءتيىستى شارا قولدانباسا, بۇل اسا ۇلكەن ەكولوگيالىق اپاتقا اينالۋى مۇمكىن ەكەنىن ەسكەرتتى.
«جاقىندا قىتايدا وتكەن شىۇ سامميتىندە وسى ماسەلەگە ارنايى توقتالىپ, ۇيىم اياسىندا سۋ ماسەلەلەرى جونىندەگى كەڭەس قۇرۋدى ۇسىندىم. كاسپي – ءبىر ەلدىڭ عانا ەمەس, بۇكىل ايماقتىڭ تاعدىرىنا قاتىسى بار ماسەلە. سوندىقتان جۇمىلىپ ارەكەت ەتۋ قاجەت. ۇكىمەت كاسپيدىڭ سۋ رەسۋرستارىن ساقتاۋ تۋرالى مەملەكەتارالىق باعدارلاما ازىرلەۋى ءتيىس. بۇل قۇجات كاسپي ماڭىنداعى ەلدەردىڭ ۇيلەسىمدى ءارى جەدەل قيمىلداۋىنا ارقاۋ بولادى», – دەدى پرەزيدەنت.
مەملەكەت باسشىسى سۋ ۇنەمدەۋ مادەنيەتىن قالىپتاستىرۋدىڭ ماڭىزىن ەرەكشە اتاپ ءوتتى.
«بۇگىن دۇرىس شەشىم قابىلداي الساق, ەرتەڭ ونىڭ يگىلىگىن كەيىنگى ۇرپاق كورەدى. بالالارىمىز بەن نەمەرەلەرىمىزدىڭ تاعدىرى ءبىزدىڭ ءىس-ارەكەتىمىزگە تىكەلەي بايلانىستى. ءبىز – ءوز بولاشاعىمىزعا ءوزىمىز جاۋاپتىمىز. سۋدى ۇنەمدەۋ مادەنيەتىن قالىپتاستىرۋ ينستيتۋتسيونالدىق نەمەسە تەحنولوگيالىق شەشىمدەردەن دە ماڭىزدى», – دەدى قاسىم-جومارت توقاەۆ.