قازاقستان قۋات كوزدەرىن جاڭعىرتىپ, ەنەرگەتيكالىق دەربەستىگىن نىعايتۋ باعىتىنداعى جۇمىستاردى جالعاستىرادى. بۇل تۋرالى مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ايتتى, دەپ جازادى Egemen.kz.
پرەزيدەنتتىڭ ايتۋىنشا, الداعى بەس جىلدا قۋاتى 6,3 گيگاۆاتت بولاتىن «جاسىل» ەنەرگيا نىساندارىن ىسكە قوسۋ جوسپارلانعان. بۇل قادام ەلىمىزدەگى بالامالى قۋات كوزدەرىنىڭ ۇلەسىن ايتارلىقتاي ارتتىرادى.
«قازىر ءبىز قۋات كوزدەرىن جان-جاقتى جاڭعىرتىپ جاتىرمىز. شەتەل ينۆەستورلارىنىڭ قاتىسۋىمەن اۋقىمدى جوبالار جۇزەگە اسۋدا. بىراق قازاقستاننىڭ تۇپكى ماقساتى – قۋات كوزدەرىن ءارتاراپتاندىرۋ ەمەس. بۇل – ەڭ الدىمەن ەلىمىزدىڭ ەنەرگيا جۇيەسىنىڭ ناقتى مۇمكىندىگى مەن مەملەكەتىمىزدىڭ ۇزاقمەرزىمدى مۇددەلەرىنە نەگىزدەلگەن تۇراقتى دامۋ جولى», – دەدى مەملەكەت باسشىسى.
وسى ورايدا قاسىم-جومارت توقاەۆ يادرولىق ەنەرگەتيكانىڭ رولىنە ەرەكشە توقتالدى.
ء«بىر اي بۇرىن الماتى وبلىسىندا قازاقستانداعى العاشقى اتوم ەلەكتر ستانتسياسىنا قاتىستى جوبا «روساتوممەن» بىرگە جۇزەگە اسىرىلا باستادى. بىراق ەكونوميكانى تۇراقتى دامىتۋ ءۇشىن بۇل جەتكىلىكسىز. ەكىنشى, ءتىپتى ءۇشىنشى اتوم ەلەكتر ستانتسياسىنىڭ قۇرىلىسىن قازىردەن باستاپ جوسپارلاي بەرۋىمىز كەرەك», – دەدى ول.
مەملەكەت باسشىسى جۋىردا قىتاي حالىق رەسپۋبليكاسىنىڭ توراعاسى سي تسزينپينمەن وتكەن كەلىسسوزدەر بارىسىندا اتوم سالاسىنداعى ستراتەگيالىق سەرىكتەستىك جونىندە ۋاعدالاستىققا قول جەتكىزىلگەنىن اتاپ ءوتتى.
«قازاقستان الەمدىك كومپانيالاردىڭ بارىمەن ءوزارا ءتيىمدى بايلانىس جاساۋعا دايىن. بۇل ۇستانىم ەلىمىزدىڭ ەنەرگەتيكالىق دەربەستىگىن قامتاماسىز ەتۋ جونىندەگى ماقساتىنا ساي كەلەدى», – دەدى پرەزيدەنت.
سونىمەن قاتار قاسىم-جومارت توقاەۆ قازاقستاننىڭ ساپالى كومىر قورى وراسان ەكەنىن اتاپ ءوتىپ: «كومىر ەنەرگەتيكاسىن دا ۇمىتپاۋىمىز كەرەك. قورشاعان ورتانى لاستامايتىن وزىق تەحنولوگيالاردى قولدانا وتىرىپ, كومىردەن الىناتىن ەنەرگيانى دامىتۋعا ەرەكشە كوڭىل ءبولۋ قاجەت. ءوزىمىزدىڭ تابيعي ارتىقشىلىقتارىمىزدى ەل يگىلىگىنە دۇرىس پايدالانا ءبىلۋىمىز كەرەك», – دەدى.