قازاق كينوسىنىڭ التىن ءداۋىرى دەيسىز بە, قازاق ونەرىنىڭ سونبەس جۇلدىزدارىنا بالايسىز با – ءوزىڭىز بىلەسىز. ءبىر عاجابى, قانداي كوتەرمە ءسوز ايتساڭىز, سوعان جاراسا بەرەتىن سەكىلدى. ءتىپتى تانىستىرۋدىڭ ءوزى اعات ەمەس پە؟ تومەندەگى تۇلعالاردى ايتامىن دا, فوتو باياعى ءارى بۇگىنگى سياقتى. ناعىز ونەردە بۇرىنعى جوق, دەمەك.
«جوعارعى قاتاردا سول جاقتان: تىلەكتەس مەيراموۆ, ءانۋار بورانباەۆ, ۋايس سۇلتانعازين, تومەنگى قاتاردا: قۇمان تاستانبەكوۆ, ءاسانالى ءاشىموۆ, قۇدايبەرگەن سۇلتانباەۆ. 1975 جىل» دەلىنىپتى استىندا.
«ماڭدايى جارقىراپ تۋعان» دەگەن تىركەس بار قازاقتا. نيەتى تارىلعان كىسىسىنە كوڭىلى تولماعاندا, «ماڭدايىڭ نەتكەن تار ەدى» دەپ جاتادى عوي. ادام تەگىندە جاقسىلىقتى باسىنىڭ الدىڭعى بولىگىمەن نەمەسە ماڭداي تۇسىمەن ويلاي ما ەكەن الدە. كىم ءبىلىپتى؟
قاز-قاتار تۇرعان قازاق تەاترى مەن كينو ونەرىنىڭ جۇلدىزدارىنىڭ ارقايسىسى حالىق ءارتىسى الدە قازاقستاننىڭ ەڭبەك سىڭىرگەن ءارتىسى. رەسمي اتاعى بولماعان جاعدايدا دا سولاي اتاۋعا ابدەن لايىقتى. تومەنگى قاتاردا سولدان ءبىرىنشى قۇمان تاستانبەكوۆ پەن ءاسانالى ءاشىموۆ – قازاقتىڭ ماڭگى جاس تولەگەنى مەن بەكەجان باتىرى. ۇلتتىق كينو تاريحىنان «قىز جىبەكتى» الىپ تاستاسا نە قالار ەدى دەگەن وي كەلەدى كەيدە. ءاربىر دەتالى ۇلتتىڭ جانىنداي سەزىلەدى. ءبىز بەكەجاندى ۇلتتىق باتىر رەتىندە قابىلداۋىمىز كەرەك, كينودا دا سولاي, ەل شەتىنە كەلگەن جاۋدى جەڭىپ كەلەدى.
ءاسانالى اعانىڭ سول جاعىنداعى «تاماشانىڭ» تارلانى قۇدايبەرگەن سۇلتانباەۆتى كىم بىلمەيدى؟ حح عاسىردىڭ كەيىنگى شيرەگىنەن «تاماشانى» الىپ تاستاساڭىز, تاعى دا تۇك قالمايدى. ويىن-ساۋىق وتاۋىن ەل اسىعا كۇتەتىن.
بۇل ءۇش بىردەي تارلاننىڭ سوڭىندا تاعى سونداي ءۇش مىقتى. تىلەكتەس مەيراموۆ پەن ءانۋار بورانباەۆتىڭ ەڭبەگى قازاق تەاترى مەن كينوسىنا ابدەن سىڭگەن. ۋايس سۇلتانعازين قولتاڭباسى تەاتر مەن «تاماشادا» بىردەي قالعان قايتالانباس ونەر يەسى. قىسقاسى, قارىس ماڭداي بۇلار ءبىر-بىرىنەن اسىپ ءتۇسىپ جاتپاسا, كەمىتەرى جوق. حالىق رۋحى مەن سانا-سەزىمىن كوتەرۋگە ولشەۋسىز تەر توككەن ءبىرتۋار ساڭلاقتاردىڭ وسىلاي توقايلاسىپ فوتوعا ءتۇسۋىنىڭ ءوزى كەزدەيسوق ەمەس.