الداعى 16-17 قىركۇيەك كۇندەرى الماتىداعى رەسپۋبليكا سارايىندا ءبىرتۋار كومپوزيتور نۇرعيسا تىلەنديەۆتىڭ 100 جىلدىعىنا ارنالعان «Qustar» كونتسەرتىنىڭ الەمدىك پرەمەراسى باستالاتىنى بەلگىلى.
قازىردىڭ وزىندە 80 ملن تەڭگەدەن استام قاراجات جۇمسالعان مۋلتيمەديالىق دۋمان ءوزىن-ءوزى اقتاي ما؟ اۋقىمدى جوبانى جۇرەكسىنبەي قولعا العان حالىقارالىق دەڭگەيدەگى تالانتتار توبى ءاربىر ءانى قۇلاعىمىزعا سىڭگەن قازاقى كومپوزيتوردىڭ اۋەندەرىن ءوز قالىبىندا بەرە الا ما؟ ينتەرپرەتاتسيا جەتەگىندەگى جوبادان تىلەنديەۆتىڭ قولتاڭباسىن كورە الامىز با؟ وسى ماقساتتا الماتىدا جوبا جەتەكشىلەرى مەن الەمگە ايگىلى سكريپكاشى ءارى ديريجەر مارات بيسەنعاليەۆ جۋرناليستەرمەن كەزدەستى.
ويتكەنى «Qustar» – جاي كونتسەرت ەمەس, نۇرعيسا تىلەنديەۆتىڭ مۋزىكالىق مۇراسىمەن ورىلگەن ونەر مەن قازاق كلاسسيكتەرىنىڭ ناقىل سوزدەرىنە تولى ەكسكليۋزيۆتى باعدارلاما بولعالى وتىر.
«Qustar» – كومپوزيتور نۇرعيسا تىلەنديەۆتىڭ عاسىرلىق تويىنا ارنالعان مۋلتيمەديالىق شوۋ عانا ەمەس. بۇل – ءبىزدىڭ كورەرمەنگە, اسىرەسە جاس ۇرپاققا جاڭا باعىت بەرۋ جولىنداعى تالپىنىسىمىز. سونداي-اق مۋلتيمەديالىق شوۋدان كانادالىق كومپوزيتور دميتري ۆارەلاستى, وسى جوبادا اۋەدە قۇستار سياقتى قالىقتاپ ءجۇرىپ ونەر كورسەتەتىن ءۇندىستان سيمفونيالىق وركەسترىنىڭ (Symphony Orchestra of India) ورىنداۋىنداعى Mۋمباي دىبىستارىن, پلاستيكالىق جانە بەينەلەۋ تەاترىنىڭ قارلىعاشى اننا ۆەردەنىڭ رەجيسسۋراسى مەن حورەوگرافياسىن, مارات بيسەنعاليەۆتىڭ ۆيرتۋوزدىق سكريپكاسىن, حوردىڭ عاجايىپ ۇيلەسىمى مەن حالىق اسپاپتارىندا وينايتىن ابزال ارىقباەۆ پەن انار قاسىموۆانىڭ قايتالانباس تالانتىن كورۋگە بولادى.
دەگەنمەن, جوبانى ءوز باستامامىزبەن جۇزەگە اسىرىپ وتىرمىز. سونىمەن قاتار يدەيانى جۇزەگە اسىرۋ مەن باعدارلامانى ازىرلەۋ بارىسىندا كومپوزيتوردىڭ تۋىندىلارىن پايدالانۋعا مۇمكىندىك بەرگەن, مۇددەلىلىك تانىتىپ ءارى سەنىم ارتقان نۇرعيسا تىلەنديەۆتىڭ قىزى – دىنزۋحراعا شىنايى العىس ايتامىز», دەيدى جوبانىڭ باس پروديۋسەرى قايرات قۇلباەۆ.
ايتقانداي, بيىل ءوزىنىڭ 20 جىلدىعىن اتاپ ءوتىپ جاتقان «Symphony Orchestra of India» الماتىداعى پرەمەراعا العاش رەت كەلگەلى وتىر. ال وسىناۋ ونەر ۇجىمىن الەمگە ءوزىن مويىنداتقان قانداسىمىز – قازاقستاننىڭ بەيبىتشىلىك ەلشىسى مارات بيسەنعاليەۆ قۇرعانىن ەسكە سالۋ ءلازىم.
ءبىر سوزبەن ايتقاندا, الماتى وسىنداي ەرەكشە دۋمانعا دايىندالىپ جاتىر. ال «Qustar» جوباسى جالعاسىن تابادى. ازىرگە البومى جازىلىپ, ستۋديالىق جۇمىستارى اياقتالدى. ودان بولەك ۇيىمداستىرۋشىلار جوبانىڭ ۆينيل البومىن دا شىعارىپ, بىرنەشە ەلگە گاسترولدىك ساپارمەن بارۋدى جوسپارلاپ وتىر.
الماتى