استانادا Cardiff University-ءنىڭ العاشقى شەتەلدىك كامپۋسى اشىلدى

سالتاناتتى شاراعا قر مەن ۇلىبريتانيا ۇكىمەتىنىڭ وكىلدەرى, سونداي-اق Cardiff University جانە Cardiff University Kazakhstan باسشىلىعى قاتىستى. قۇرمەتتى قوناقتاردىڭ اراسىندا قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك, ۇلىبريتانيانىڭ قازاقستانداعى توتەنشە جانە وكىلەتتى ەلشىسى ساللي اكسۆورتي حانىم, Cardiff University پرەزيدەنتى ءارى ۆيتسە-كانتسلەرى پروفەسسور ۆەندي لارنەر, ۋنيۆەرسيتەتتىڭ باس وپەراتسيالىق ديرەكتورى جانە حاتشىسى, Cardiff University Kazakhstan ديرەكتورلار كەڭەسىنىڭ توراعاسى دوكتور پولا ساندەرسون, Cardiff University كەڭەسىنىڭ توراعاسى پاتريك يانگ, كامپۋس سەرىكتەسى Qualified Centre of Education قوعامدىق قورىنىڭ تەڭ قۇرىلتايشىسى ءارى ديرەكتورى قۋانىش كوشەكباەۆ, سونداي-اق Cardiff University تۇلەكتەرى مەن حالىقارالىق ۇيىم وكىلدەرى بولدى.

Cardiff University پرەزيدەنتى جانە ۆيتسە-كانتسلەرى پروفەسسور ۆەندي لارنەر ەلوردا استانادا Cardiff University فيليالىنىڭ اشىلۋى تاريحي وقيعا ەكەنىن اتاپ ءوتتى. 

«بۇل – ۋنيۆەرسيتەتتىڭ العاشقى شەتەلدىك كامپۋسى. ءبىز قازاقستانداعى العاشقى ستۋدەنتتەرىمىزدى قابىلداۋدى تاعاتسىزدانا كۇتىپ وتىرمىز. Russell Group قۇرامىندا قازاقستاندا كامپۋس اشۋ ءبىزدىڭ جاھاندىق ستراتەگيامىزدىڭ ماڭىزدى بولىگى. قازاقستاننىڭ حالىقارالىق ءبىلىم بەرۋ ورتالىعىنا اينالۋ باستاماسىن قولداي وتىرىپ, ءبىلىمنىڭ ەل دامۋىنىڭ نەگىزگى قوزعاۋشى كۇشىنە اينالاتىنىنا سەنەمىز. بۇل كۇن – بىرلەسكەن ەڭبەكتىڭ جەمىسى. اسىرەسە قازاقستان ۇكىمەتىنە كورسەتكەن قولداۋى ءۇشىن ريزاشىلىعىمدى بىلدىرەمىن. Cardiff University Kazakhstan ۇزاق مەرزىمدى ىنتىماقتاستىقتىڭ باستاۋى بولادى دەپ سەنەمىن», دەدى ول.

Cardiff University باس وپەراتسيالىق ديرەكتورى جانە Cardiff University Kazakhstan ديرەكتورلار كەڭەسىنىڭ توراعاسى, دوكتور پولا ساندەرسون ترانسۇلتتىق ءبىلىم بەرۋ سالاسىن زەرتتەۋشى رەتىندە ساياسات نۇربەكتىڭ قازاقستاندا ىسكە اسىرىپ وتىرعان ستراتەگياسىن ەرەكشە باعالايتىنىن ايتتى.

«بۇل باستاما ەلدى ايماقتىق قانا ەمەس, جاھاندىق ءبىلىم بەرۋ ورتالىعىنا اينالدىرىپ, بىلىمگە نەگىزدەلگەن ەكونوميكانىڭ قوزعاۋشى كۇشى بولاتىنىنا سەنەمىن. Cardiff University وسى ماڭىزدى پروتسەستىڭ ءبىر بولىگى بولعانىن ماقتان تۇتادى», دەدى پولا ساندەرسون.

ال ۇلىبريتانيانىڭ قازاقستانداعى توتەنشە جانە وكىلەتتى ەلشىسى ساللي اكسۆورتيدىڭ ايتۋىنشا, بۇل جوبا ەكى ەل اراسىنداعى ءبىلىم سالاسىنداعى ىنتىماقتاستىقتىڭ جاڭا كەزەڭىن اشادى. قازاقستاندىق جاستار ەندى الەمدىك دەڭگەيدەگى بريتاندىق بىلىمگە قول جەتكىزىپ, مەملەكەتتەردىڭ بايلانىسىن ودان ءارى نىعايتادى.

ايتا كەتەيىك, Cardiff University حالىقارالىق رەيتينگتەردە ءداستۇرلى تۇردە جوعارى ورىندارعا يە. QS World University Rankings 2026 مالىمەتىنشە, ۋنيۆەرسيتەت الەم بويىنشا 181-ورىندا, ال Complete University Guide 2026 تىزىمىندە 22-ورىنعا تابان تىرەگەن. 2025 جىلدىڭ قىركۇيەگىنەن باستاپ Cardiff University Kazakhstan ستۋدەنتتەردى ءتورت جىلدىق باكالاۆريات باعدارلامالارى بويىنشا قابىلدايدى: كومپيۋتەرلىك عىلىمدار, بيزنەس باسقارۋ, ازاماتتىق قۇرىلىس جانە گەولوگيا. بارلىق كۋرستار اعىلشىن تىلىندە وقىتىلادى, ساباقتاردى Cardiff University جانە Cardiff University Kazakhstan پروفەسسور-وقىتۋشىلار قۇرامى جۇرگىزەدى.

اشىلۋ ءراسىمى ەكى ەلدىڭ مادەني بايلانىسىن ايشىقتاعان ارنايى باعدارلاماعا ۇلاسقان. قوناقتار قازاقتىڭ ۇلتتىق تاعامدارىمەن جانە ۆاللي تاتتىلەرىمەن تانىسىپ, ارفادا ورىندالعان ءداستۇرلى اۋەندەردى تىڭداپ, قازاقستاندىق جانە ۆاللي مادەنيەتىنىڭ سينتەزىن كورسەتكەن ونەر قويىلىمدارىن تاماشالادى.