توعىز ءبىلىم وشاعى ەسىگىن اشتى

«بۇل – اۋىل عانا ەمەس, اۋدانىمىز ءۇشىن ۇلكەن قۋانىش. ورىن سانى 4,5 مىڭعا كوبەيىپ, ءۇشاۋىسىمدى مەكتەپ سانى 9-دان 3-كە كەمىدى. بيىلدىڭ وزىندە «كەلەشەك مەكتەپتەرى» باعدار­لا­ماسى اياسىندا 3 مەكتەپ ىسكە قو­سىلىپ وتىر. بۇل – وسكەلەڭ ۇر­پاق­­قا جاسالعان قامقورلىق, ەل ەرتە­ڭىنە سالىنعان ينۆەستيتسيا», دەپ اتاپ ءوتتى اۋدان اكىمى نۇرلان ەرتاس.

جاڭا مەكتەپكە 430 وقۋشى قابىلدانسا, ولاردىڭ ىشىندە 26 بالدىرعان مەكتەپ تابالدىرىعىن العاش اتتاپ وتىر. ءبىلىم وشاعى زاماناۋي تالاپتارعا ساي جاب­دىقتالعان. كەڭ دە جارىق سىنىپ كابينەتتەرى مەن سپورت جانە ەڭبەككە, ونەرگە باۋليتىن ارنايى زالدار قاجەتتى قۇرالدارمەن جابدىقتالىپ, وقۋشىلاردىڭ جان-جاقتى دامۋىنا قولايلى جاعداي جاسالعان.

سونداي-اق ىلە اۋدانىنا قاراستى مۇحامەدجان تۇيمەباەۆ اۋىلىندا 900 ورىندىق جاڭا مەكتەپ پايدالانۋعا بەرىلدى. بۇل نىسان «Amanat» پارتياسىنىڭ سايلاۋالدى باعدارلاماسى اياسىندا بوي كوتەرىپ, پارتيانىڭ تىكەلەي باقىلاۋىندا بولعان.

«پارتيا اپاتتى جانە ءۇشاۋى­سىم­دى مەكتەپتەردى جويۋدى مىندەت ەتىپ قويدى. ەكى جىل بۇرىن وبلىستا مۇنداي 52 مەكتەپ بولعان. بۇگىنگى مەكتەپتىڭ اشىلۋى – سول ۋادەنىڭ ورىندالعانىنىڭ دالەلى. ول – جول كارتاسىندا بەلگىلەنگەن 63 نىساننىڭ ءبىرى. مۇندا «STEM» زەرتحاناسى, روبوتتەحنيكا كابينەتى, سپورت جانە شىعارماشىلىق سىنىپتار جابدىقتالعان», دەپ اتاپ ءوتتى وبلىستىق فيليالدىڭ اتقارۋشى حاتشىسىنىڭ ورىنباسارى اسلان كوبەنتاەۆ.

جاڭا وقۋ جىلىندا ەڭبەكشى­قازاق اۋدانىنا قاراستى تولە بي اۋىلىندا دا 450 ورىندىق جاڭا مەكتەپ اشىلدى. ونىڭ قۇرىلىسى قارجىلاندىرۋ تاپشىلىعىنا بايلانىستى ءتورت جىلعا جۋىق ۋاقىتقا سوزىلىپ كەتكەن ەدى. وسى ۋاقىت ارالىعىندا 600-دەن استام وقۋشى تار ءارى جارتى عاسىر بۇرىن سالىنعان ەسكى عيماراتتا ءبىلىم الۋعا ءماجبۇر بولدى.

جوبانىڭ اياقتالۋىنا «Amanat» پارتياسى تىكەلەي ارالاستى. پارتيا باستاماسىمەن وبلىستىق بيۋدجەتتەن قوسىمشا قاراجات ءبولىنىپ, فراكتسيا دەپۋتاتتارى قۇرىلىس بارىسىن تۇراقتى باقىلاۋدا ۇستادى. سونىڭ ناتيجەسىندە اۋىل تۇرعىندارىنىڭ كوپتەن كۇتكەن ارمانى ورىندالىپ, جاڭا مەكتەپ ءوز ەسىگىن ايقارا اشتى.

ايتا كەتەيىك, ءبىلىم ينفرا­قۇرىلىمىن دامىتۋ – «Amanat» پارتياسىنىڭ باستى باسىم­دىق­تا­رىنىڭ ءبىرى. جاڭا مەكتەپتەردىڭ اشىلۋى ءۇشاۋىسىمدى وقىتۋدى ازايتىپ قانا قويماي, مۇعالىمدەر ءۇشىن تۇراقتى جۇمىس ورىندارىن كوبەيتۋگە, سونداي-اق مىڭداعان وقۋشىعا زاماناۋي ءارى قاۋىپسىز جاعدايدا ءبىلىم الۋعا مۇمكىندىك بەرەدى.

«بۇگىن وبلىسىمىزداعى 491 مەكتەپ ەسىگىن ايقارا اشىپ, 362 مىڭنان اسا وقۋشى وقۋ جىلىن باستادى. وسى وقۋ جىلىندا 1-سىنىپتىڭ وزىنە عانا 35 500 بالا قابىلدانىپ وتىر. بۇل بارلىق بالا سانىنىڭ 10 پايىزىن قۇرايدى جانە وڭىردە بالا سانىنىڭ قارقىندى ءوسىپ وتىرعانىن كورسەتەدى», دەيدى وبلىستىق ءبىلىم باسقارماسىنىڭ باسشىسى ارايلىم اقسۋبايقىزى.

الماتى وبلىسى