قوناەۆ قالاسىنا قاراستى شەڭگەلدى اۋىلدىق وكرۋگىندە كۇزگى جيىن-تەرىم جۇمىستارى قىزا تۇسكەن. بۇعان دەيىن نەگىزىنەن پياز وسىرۋمەن اينالىسقان ءوڭىر شارۋالارى كەيىنگى جىلدارى اۋىل شارۋاشىلىعىن ارتاراپتاندىرۋعا بەت بۇرا باستادى.
سونىڭ ايعاعى رەتىندە بيىل «ماريام» شارۋا قوجالىعى العاش رەت قاۋىن ەگىپ وتىر. جالپى, 280 گەكتار جەردى يگەرگەن قوجالىق ەڭبەككەرلەرى 2 گەكتارعا ءتورت ءتۇرلى قاۋىن وتىرعىزىپ, گەكتارىنا 40 توننادان ءونىم الدى.
«قاۋىن ەلىمىزدىڭ وڭتۇستىگىندە كوپ وسىرىلەدى. بيىل ءبىز دە تاجىريبە رەتىندە ەگىپ كوردىك. ەڭبەگىمىز اقتالىپ, ءونىم وتە ساپالى شىقتى. تاتتىلىگىنە وزگە كاسىپكەرلەر دە تاڭعالدى. ءونىمدى نەگىزىنەن الماتىداعى ءىرى بازارلارعا جونەلتۋدەمىز. ەندىگى جىلى قاۋىن القابىن ۇلعايتۋدى جوسپارلاپ وتىرمىز», دەيدى قوجالىق باسشىسى بەكزات زامانبەكوۆ.
قوجالىق بۇدان بولەك 220 گەكتارعا جۇگەرى, 20 گەكتارعا باقشا داقىلدارىن, 14 گەكتارعا پياز, 30 گەكتارعا جوڭىشقا ەككەن. الداعى ۋاقىتتا ەگىستىك اۋماعىن 500 گەكتارعا دەيىن كەڭەيتۋدى جوسپارلاپ وتىر. سونىمەن قاتار شارۋاشىلىق يەسى مەملەكەت تاراپىنان ينفراقۇرىلىمدى دامىتۋعا سۋبسيديا الۋ ءۇشىن قۇجاتتار راسىمدەپ جاتقانىن ايتتى. بۇعان دەيىن «كەڭدالا-2» باعدارلاماسى ارقىلى 40 ملن تەڭگە نەسيە الىپ, ءىسىن ىلگەرىلەتكەن.
شارۋالاردىڭ قۇت مەكەنىنە اينالعان شەڭگەلدىدە پياز ەگۋمەن اينالىساتىن «باۋىر» شارۋا قوجالىعى بيىل 70 گەكتار اۋماقتى يگەرگەن. قازىر 20 گەكتاردان 1 600 توننا ءونىم الدى.
جالپى, شەڭگەلدىدە 11 769 گەكتار جەر يگەرىلدى. 13 شارۋا قوجالىعى 2 000 گەكتار اۋماقتا سۋ ۇنەمدەۋ تەحنولوگيالارىن قولدانۋدا (900 گەكتارىن – جاڭبىرلاتىپ, 1 100 گەكتارىن – تامشىلاتىپ سۋارۋ). بيىلعى ناۋقان كەزىندە 315 توننا بيداي, 3 127 توننا ارپا, 1 750 توننا كارتوپ, 1 950 توننا پياز, 4 430 توننا باقشا داقىلى جانە 21 247 توننا مال ازىعىن جيناۋ كوزدەلگەن.
كۇزگى دالا جۇمىسىنا 119 توننا ارزانداتىلعان ديزەل وتىنى ءبولىنىپ, شارۋالارمەن كەلىسىمشارت جاسالعانىن اتاپ وتكەن ءجون.
الماتى وبلىسى