قاسىم-جومارت توقاەۆ قىتايدىڭ تيانتسزين قالاسىندا وتكەن شانحاي ىنتىماقتاستىق ۇيىمىنىڭ سامميتىنە قاتىستى. اۋقىمدى جيىنعا جيىرمادان استام ەلدىڭ باسشىلارى كەلىپ, قاۋىپسىزدىك, ەكونوميكا جانە كليمات ماسەلەلەرى تالقىلاندى. وسىعان وراي ساياسي ساراپشى, دوكتور روبەرت كۋتلەر The Times of Central Asia باسىلىمىنا ارنايى پىكىر ءبىلدىردى, دەپ جازادى Egemen.kz.
كۋتلەردىڭ ايتۋىنشا, «تيانتسزين ءسامميتى شىۇ-نىڭ جيىرما بەس جىلدىق تاريحىنداعى ەڭ ءىرىسى بولدى. قىتاي, رەسەي, ءۇندىستان, پاكىستان, يران جانە قازاقستان كوشباسشىلارىنىڭ قاتىسۋى ۇيىمنىڭ حالىقارالىق سالماعىن ارتتىرا ءتۇستى».
شىن مانىندە, بۇل جولى ەلىمىزدىڭ ءرولى ايرىقشا بايقالدى. 2024 جىلعى توراعالىعى كەزىندە استانا ۇسىنعان باستامالار – ەنەرگەتيكالىق ستراتەگيا, مادەني مۇرانى ناسيحاتتاۋ, دەنساۋلىق ساقتاۋ سالاسىندا ىنتىماقتاستىق قۇرۋ – تيانتسزيندە ناقتى شەشىمدەرگە اينالدى. اسىرەسە, شىۇ-نىڭ 2030 جىلعا دەيىنگى ەنەرگەتيكالىق ىنتىماقتاستىق ستراتەگياسىنىڭ قابىلدانۋى قازاقستاننىڭ كوپۆەكتورلى ساياساتىنىڭ تابىستى ناتيجەسى بولىپ وتىر.
سونىمەن بىرگە استانا تەك ۇلكەن دەرجاۆالاردىڭ ويىنشىسى ەمەس, وڭىرلىك مەدياتور رەتىندەگى ءرولىن دە ايقىن كورسەتتى. جاڭا مۇشەلەردىڭ ينتەگراتسياسىن ۇيلەستىرۋ, ۇيىم ىشىندەگى كونسەنسۋستى ساقتاۋ – ورتا مەملەكەت ءۇشىن ۇلكەن ديپلوماتيالىق قادام.
كۋتلەر بۇل تۋرالى: «قازاقستان ەندى تەك قاتىسۋشى ەمەس, كۇن ءتارتىبىن ايقىنداۋشى ەلگە اينالدى», دەپ اتاپ ءوتتى.
وسىلايشا, تيانتسزين دەكلاراتسياسىندا قازاقستاننىڭ قولتاڭباسى ايقىن كورىنەدى. ەگەر العا قويىلعان باعىتتار جۇزەگە اسسا, ەلىمىزدىڭ ەۋرازيالىق كوپجاقتىلىقتاعى ورنى بۇرىنعىدان دا بەكي تۇسەتىنى ءسوزسىز.