ءاليحاننىڭ يتالياداعى دەبيۋتى

وعان مۇنداي جەتىستىككە جەتۋ بىردەن وڭاي بولعان جوق. جىل باسىندا يتاليادا اقش, لاتىن امەريكاسى, فرانتسيا جانە باسقا دا ەلدەردىڭ ۆوكاليستەرىن جيناعان اۋقىمدى تىڭدالىم وتكەن ەدى. سوڭعى مارەدە ونىمەن بىرگە يتاليا­لىق ۇمىتكەر قالدى. الايدا ماڭىز­­دى شەشىمدى كوميسسيا توراعاسى, ماەس­ترو,­ اتاقتى ميرەللا فرەنيدىڭ جارى لەونە مادجەرا قابىلدادى. ول ءبىزدىڭ اليحانعا نەگىزگى پارتيانى سەنىپ تاپسىرىپ, وتانداسىمىزدىڭ بىرەگەي ۆوكال­دىق تالانتىن ەرەكشە باعالادى.

وپەرانىڭ قويىلىمى الداعى قا­راشادا باستالادى. ودان كەيىن دە­بيۋتتىك سپەكتاكلدەر جەلتوقساندا وتە­دى: ەكى كورسەتىلىم لۋككادا ۇسىنىلسا, تاعى ەكەۋى كەلەسى جىلى قاڭتاردا فەر­رارادا تانىستىرىلادى. رولگە دايىندىق جۇمىسى الدەقاشان باس­تالعان. الدىمەن دايىندىق ميلان­دا ءوتىپ, ودان كەيىن باكۋدە جالعاستى. بۇل جاققا ءانشى «استانا وپەرانىڭ» تەاتر ماۋسىمى اياقتالىسىمەن اتتانعان بولاتىن.

«كەز كەلگەن دەبيۋتكە دايىندىق – ۇلكەن جاۋاپكەرشىلىك. استاناداعى جانە ميلانداعى پروفەسسورلارىمنىڭ ارقاسىندا يتالياداعى ءوزىمنىڭ ەكىنشى دەبيۋتىمە مۇقيات دايىندالىپ جاتىرمىن. دج.ءروسسينيدىڭ «كۇلبيكە» وپەراسىنداعى دون راميرو حانزادانىڭ پارتياسى – كۇردەلى ۆوكالدىق ماتە­­ريال. وندا ۆيرتۋوز كولوراتۋرالار مەن جوعارى نوتالار كوپ كەزدەسەدى. قازىر تەاترداعى جۇمىسىمنان بولەك, بارلىق بوس ۋاقىتىمدى وسىعان ارناپ وتىرمىن. بۇل وپەرا تىڭعىلىقتى ەڭبەكتى تالاپ ەتەتىن جانە ءتىلدىڭ كوپتەگەن كۇردەلى يديومالىق اينالىمى كەزدەسەتىن ناعىز يتاليالىق تۋىندى», دەدى ول.

دارىندى جاستىڭ ونەردەگى اياق الىسى ەرەكشە قۋانتادى. ايتالىق, كوكتەمدە سانكت-پەتەربورداعى «كلاس­سيكا نا دۆورتسوۆوي» فەستيۆالىنىڭ تاريحىنا ەنىپ, وسى ايتۋلى ساحنادا ونەر كورسەتكەن تۇڭعىش قازاق ءانشىسى اتاندى. سونداي-اق بىلتىر فلورەنتسياداعى «Maggio Musicale» تەاترىندا جانە پەزاروداعى دج.روسسيني اكادەمياسىندا تاعىلىمدامادان وتكەن. سول كەزدە ول ايگىلى روسسيني فەستيۆالىندە «رەيمسكە ساياحات» وپەراسىندا دەبيۋت جاسادى. ودان كەيىن وعان رۋمىنيا­دان شاقىرتۋ كەلدى. سول جاقتا ءانشى ­بۋف­فا جانرىنىڭ الەمدىك شەبەرى, يتا­ليا­لىق باس برۋنو دە سيمونەمەن بىرگە «سەۆيلدىك شاشتاراز» وپەراسىن­داعى گراف الماۆيۆانىڭ پارتياسىن ­ورىندادى.