الەۋمەتتىك شىعىنداردىڭ تيىمدىلىگى تالقىلاندى

پلەنارلىق وتىرىستى پرەمەر-ءمينيستردىڭ ورىنباسارى ەرمەك كوشەرباەۆ اشتى. ول وڭتايلاندىرۋدىڭ باستى ماقساتى – الەۋمەتتىك كومەكتىڭ اتاۋلىلىعىن ءارى ادىلدىگىن قامتاماسىز ەتۋ ەكەنىن اتاپ ءوتتى.

«مەملەكەت الەۋمەتتىك سالاعا ايرىق­شا نازار اۋدارۋدى جالعاستىرۋدا, رەسپۋبليكالىق بيۋدجەتتىڭ 40%-دان استامى ءداستۇرلى تۇردە ازاماتتاردى قولداۋعا باعىتتالادى. ماڭىزدىسى – مەملەكەتتىك قولداۋ شىنىمەن مۇقتاج جاندارعا جەتۋگە ءتيىس», دەدى ۆيتسە-پرەمەر.

سەمينار-كەڭەس بارىسىندا جوعارى اۋديتورلىق پالاتا مەن سالالىق مينيستر­لىكتەر انىقتاعان الەۋمەتتىك تولەمدەردى ماقساتسىز پايدالانۋ فاكتىلەرى قارالدى. ول: زاڭدى نەگىزى جوق ازاماتتاردىڭ جاردەم­اقى الۋى, جۇمىسسىزدىق پەن دەكرەت­تىك تولەمدەردى تاعايىنداۋ كەزىندەگى الاياقتىق جاعدايلارى, بىرىڭعاي جيناق­تاۋشى زەينەتاقى قورى قاراجاتىن ستوماتو­لوگيالىق قىزمەتتەرگە ماقساتسىز پايدالانۋ, مەكتەپتەگى تاماقتاندىرۋ مەن اتاۋلى الەۋمەتتىك كومەك تاعايىنداۋدا جاعدايى بار وتباسىلارعا جەڭىلدىكتەر بەرۋ.

ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە, 2025 جىلعى 1 تامىزداعى جاعداي بويىنشا 429 مىڭ جۇمىسسىز ازامات تىركەلگەن. جۇمىسسىزدىق بويىنشا جاردەماقى تولەۋگە مەملەكەتتىك الەۋمەتتىك ساقتاندىرۋ قورىندا 127 ملرد تەڭگە قاراستىرىلعان. الايدا بۇل كومەكتى ءىس جۇزىندە مۇقتاج ەمەس ادامدار دا العان جاعداي انىقتالعان.

«كونستيتۋتسيا كەپىلدىك بەرگەن بارلىق الەۋمەتتىك تولەمدەر ازاماتتارعا تولىق كولەمدە ءارى قىسقارتۋسىز تولەنەدى. وڭتايلاندىرۋ تەك قانا تەرىس پايدالانۋ جا­عدايلارىن جويۋعا جانە الەۋمەتتىك كومەكتىڭ اتاۋلىلىعىن ارتتىرۋعا باعىتتالعان. ۇنەمدەلگەن قاراجات شىن مانىندە مۇقتاج ازاماتتارعا قولداۋدى كۇشەيتۋگە مۇمكىندىك بەرەدى», دەدى ەرمەك كوشەرباەۆ.

ۆيتسە-پرەمەر الەۋمەتتىك شىعىستاردى وڭتايلاندىرۋ باعىتىندا قىزىلوردا وبلىسى ۇلكەن جۇمىس جۇرگىزگەنىن اتاپ ايتتى. وڭىردە جەكەمەنشىك بالاباقشا مەن مەكتەپتى قارجىلاندىرۋعا, «ارتسپورت» باعدارلاماسىنا, گرانتتارعا جانە باسقا دا باعىتقا بولىنگەن قاراجاتقا كەشەندى تالداۋ جاسالدى. ناتيجەسىندە, ءتيىمسىز شىعىستار انىقتالىپ, شامامەن 100 ملرد تەڭگە ۇنەمدەلدى. ۇنەمدەلگەن قاراجات ءوڭىردىڭ الەۋمەتتىك ينفراقۇرىلىمىن دامىتۋ مەن از قامتىلعان وتباسىلاردى قولداۋ سياقتى باسىم مىندەتتەرگە باعىت­تالدى. وبلىس اكىمى نۇرلىبەك نالى­باەۆ بۇل تاجىريبەنى ەلدىڭ باسقا وڭىرلەرىندە دە قولدانۋعا بولاتىنىن ايتتى. سەمينارعا قاتىسۋشىلار قىزىلوردا وبلىسىنىڭ ۇزدىك تاجىريبەلەرىن جەرگىلىكتى بيۋدجەت ەرەكشەلىكتەرى مەن حالىقتىڭ الەۋمەتتىك قاجەتتىلىكتەرىن ەسكەرە وتىرىپ بەيىمدەۋگە دايىن ەكەنىن ءبىلدىردى.

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا: «باستى ماقساتىمىز – الەۋمەتتىك قورعاۋ جۇيەسىن ادىلەتتى ءارى ءتيىمدى ەتۋ. وتكەن جىلى الەۋمەتتىك سالاعا 6,1 ترلن تەڭگەدەن استام قارجى ءبولىندى, بۇل قاراجات بارىنشا ناتيجەلى جۇمىس ىستەپ, شىنىمەن قيىن جاعدايداعى وتباسىلارعا كومەك بولىپ جەتۋ­گە ءتيىس», دەدى.

سەمينار قورىتىندىسىندا قاتىسۋ­شىلارعا حالىق اراسىندا ءتۇسىندىرۋ جۇمىستارىن كۇشەيتۋ, اسىرەسە كونستي­تۋتسيالىق تۇرعىدان كەپىلدىك بەرىلگەن الەۋمەتتىك تولەمدەردىڭ وزگەرمەيتىنى جانە بيۋدجەت قاراجاتىنىڭ ءادىل ءبولىنۋى تۋرالى اقپاراتتى جەتكىزۋ تاپسىرىلدى.