الماتى, جامبىل, قىزىلوردا, تۇركىستان, جەتىسۋ وبلىستارىندا ەگىس القاپتارىن سۋارۋ ءۇشىن جوسپارلانعان 10,1 ملرد تەكشە مەتر سۋدىڭ 9,9 ملرد تەكشە مەترى الىنعان, قالعان 200 ملن تەكشە مەتر سۋ ۆەگەتاتسيا كەزەڭىنىڭ سوڭىنا دەيىن الىنادى, دەپ جازادى Egemen.kz.
ۆەگەتاتسيا كەزەڭى باستالعالى الماتى وبلىسىندا 1,2 ملرد تەكشە مەتر سۋ الىنىپ, 136 مىڭ گەكتار ەگىستىك سۋارىلعان. ال جەتىسۋ وبلىسىندا 1 ملرد تەكشە مەتر سۋ الىنىپ, 132 مىڭ گەكتار جەر سۋارىلدى. جامبىل وبلىسىندا الىنعان سۋ كولەمى 897 ملن تەكشە مەتر بولعان, 70 مىڭ گەكتار كولەمىندەگى ەگىستىك سۋارىلعان. ال كەستەگە سايكەس كۇرىشتىڭ ماساقتانۋ كەزەڭى ءوتىپ جاتقان قىزىلوردا وبلىسىنىڭ العان سۋ كولەمى 3,476 ملرد تەكشە مەتردى قۇراپ وتىر. تۇركىستان وبلىسىنا 3,27 ملرد تەكشە مەتر سۋ بەرىلگەن.
ەلىمىزدىڭ باسقا وڭىرلەرىندە جالپى كولەمى 327 ملن تەكشە مەتر سۋ الىنعان.
سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆتىڭ ايتۋىنشا ەلىمىزدە سۋارۋ ماۋسىمى اياقتالۋعا جاقىن. مينيسترلىك قابىلداعان شارالار ۆەگەتاتسيا كەزەڭىنىڭ قالعان بولىگىن تۇراقتى وتكىزۋگە مۇمكىندىك بەرىپ وتىر.
«ەلدىڭ وڭتۇستىگىندە كانالدار ارقىلى سۋدى كەزەكپەن بەرۋ كەستەلەرى بەكىتىلدى, سورعى قوندىرعىلارى مەن تىك درەناج جۇيەلەرى قوسىلدى, سونداي-اق سۋ شارۋاشىلىعى جاعدايىنا تۇراقتى مونيتورينگ جۇرگىزىلىپ, كوللەكتورلىق-درەناجدىق سۋ قايتالاما پايدالانىلىپ جاتىر», دەدى ن.الدامجاروۆ.