26 تامىز كۇنى مۇسا جالەل اتىنداعى تاتار مەملەكەتتىك اكادەميالىق وپەرا جانە بالەت تەاترىندا حاميت شانعاليەۆتىڭ «حان سۇلتان. التىن وردا» وپەراسىنىڭ پرەمەراسى ءوتتى, دەپ حابارلايدى Egemen.kz.
قويىلىم اباي اتىنداعى قازاق ۇلتتىق وپەرا جانە بالەت تەاترىنىڭ گاسترولدىك باعدارلاماسى اياسىندا قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي ۇيىمداستىرىلدى. جوبا قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ, تاتارستان رەسپۋبليكاسى مادەنيەت مينيسترلىگىنىڭ جانە قازاقستان رەسپۋبليكاسىنىڭ قازانداعى باس كونسۋلدىعىنىڭ قولداۋىمەن جۇزەگە استى.
اباي اتىنداعى قازۇتوب تاۋەلسىزدىك جىلدارىنان بەرى قازان قالاسىنا العاش رەت گاسترولدىك ساپارمەن كەلدى. ترۋپپانىڭ قۇرامىندا ايگىلى ساحنا شەبەرلەرى, سيمفونيالىق وركەستر, حور, بالەت ارتىستەرى مەن تەحنيكالىق ماماندار بار. بارلىعى 250 ادامنان تۇراتىن ۇجىممەن بىرگە 16 توننادان استام بىرەگەي دەكوراتسيالار مەن كوستيۋمدەر جەتكىزىلدى. قازان كورەرمەنىنە اسەرلى قويىلىم ۇسىنىلدى.
باستى پارتيالاردى قازاقستاننىڭ ەڭبەك سىڭىرگەن قايراتكەرلەرى گۇلزات داۋىرباەۆا مەن بولات بۇكەنوۆ, سونداي-اق جەتەكشى سوليستەر وكسانا داۆىدەنكو, ماقسات ساماتوۆ, ەۆگەني شاگاروۆ ورىندادى. ديريجەرلىك پۋلتتە – قازاقستاننىڭ ەڭبەك سىڭىرگەن قايراتكەرى, قازۇتوب-تىڭ باس ديريجەرى ءارى 18 جىلدان بەرى تاتار وپەرا تەاترىندا ەڭبەك ەتىپ كەلە جاتقان نۇرجان بايبۋسينوۆ بولدى. قازان كورەرمەنىنە گۇلزات داۋىرباەۆا دا جاقسى تانىس – ول جەتى جىل بويى تاتار ساحناسىندا تابىستى قىزمەت ەتكەن.
قالاداعى اۋەجايدان باستاپ نەگىزگى ورىندارعا دەيىن جارنامالىق باننەرلەر مەن بەينەروليكتەر ءىلىندى. پرەمەرا كۇنى تەاتردا تولىق زال – انشلاگ بولدى. قازاقستاننان كەلگەن ترۋپپانىڭ قويىلىمىنا قىزىعۋشىلىق زور بولدى. قازاندا ءدال وسى كەزەڭدە «جاڭا تولقىن» حالىقارالىق بايقاۋى سياقتى مادەني شارالار ءوتىپ جاتقانىنا قاراماستان, «حان سۇلتان. التىن وردا» پرەمەراسىنا بيلەتتەر ساناۋلى كۇن ىشىندە تۇگەل ساتىلىپ كەتتى.
وپەرا وقيعاسى التىن وردانىڭ قۇرىلۋ كەزەڭىنە ارنالىپ, باستى كەيىپكەر رەتىندە جوشى حاننىڭ جارى, حان بەركەنىڭ اناسى – حان سۇلتان بەينەسى الىنعان. ول ءوز پاراساتى مەن ساياسي كورەگەندىگى ارقىلى جوشى ۇلىسىنىڭ ءىرى تۇلعالارىنا ىقپال ەتكەن تاريحي تۇلعا رەتىندە كورسەتىلدى.
جوباعا تۇركىتىلدەس ەلدەردىڭ عىلىمي ورتالىقتارى مەن عالىمدارى ەلەۋلى ۇلەس قوستى. عىلىمي كەڭەسشىلەر قاتارىندا التىن وردا مەن تاتار حاندارى تاريحىن زەرتتەۋ ورتالىعىنىڭ جەتەكشىسى يلنۋر ميرگاليەۆ, ىستامبۇلداعى مارمارا ۋنيۆەرسيتەتىنىڭ پروفەسسورى يلياس كەمالوعلۋ جانە تاريح عىلىمدارىنىڭ كانديداتى نۇرلان اتىعاەۆ بولدى.
جوبانىڭ اۆتورى – اينۇر كوپباساروۆا. «حان سۇلتان» وپەراسى دراماتۋرگ الماس ءنۇسىپتىڭ شىعارماسى نەگىزىندە جازىلىپ, مارالتاي ىبىراەۆتىڭ ساحنالىق نۇسقاسىندا ۇسىنىلدى. قويۋشى-رەجيسسەر – يتاليادان كەلگەن داۆيدە ليۆەرمورە. ول الەمدىك دەڭگەيدەگى تانىمال انشىلەر جانە رەجيسسەرلەرمەن جۇمىس ىستەپ, لا سكالا, ريم, تۋرين, گەنۋيا تەاترلارىندا سپەكتاكل قويعان.
قويۋشى-ديريجەر – قازاقستاننىڭ ەڭبەك سىڭىرگەن قايراتكەرى نۇرجان بايبۋسينوۆ. قويىلىم كلاسسيكالىق وپەرا جانرىندا جازىلعانىمەن, زاماناۋي تەحنولوگيالار كەڭىنەن قولدانىلدى. ساحنالىق كورىنىستە بەينەمازمۇن ەرەكشە شەشىممەن ەنگىزىلىپ, كورەرمەنگە جاڭا اسەر سىيلادى. سونداي-اق ءومىردىڭ سيمۆولى سانالاتىن تەرەك بۇتاعى ەرەكشە ساحنالىق دەتال رەتىندە قولدانىلدى.