پرەزيدەنت قاسىم-جومارت توقاەۆ تاجىكستان مادجليسي ولي مادجليسي ميللي توراعاسى رۋستامي ەموماليدى قابىلداپ, قازاق-تاجىك ستراتەگيالىق سەرىكتەستىگى جانە وداقتاستىق قاتىناستارىن پارلامەنتارالىق بايلانىستاردى دامىتۋ ماسەلەسىن تالقىلادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى ەكىجاقتى ىنتىماقتاستىقتىڭ دامۋ قارقىنىنا جوعارى باعا بەردى. سونداي-اق رۋستامي ەموماليدىڭ ساپارى قازاقستان مەن تاجىكستاننىڭ ءوزارا ىقپالداستىعىن ودان ءارى نىعايتۋدا ماڭىزدى ەكەنىنە توقتالدى.
تاجىكستان پارلامەنتى جوعارى پالاتاسىنىڭ سپيكەرى قوناقجايلىق تانىتقانى ءۇشىن مەملەكەت باسشىسىنا العىس ايتىپ, تاجىكستان پرەزيدەنتى ەمومالي راحموننىڭ سالەمىن جەتكىزدى.
رۋستامي ەمومالي قازاقستان تاجىكستاننىڭ سەنىمدى ستراتەگيالىق سەرىكتەسى جانە وداقتاسى ەكەنىن اتاپ ءوتتى. سونىمەن قاتار مەملەكەت باسشىسىن قازاقستان رەسپۋبليكاسى كونستيتۋتسياسىنىڭ 30 جىلدىعىمەن قۇتتىقتاپ, حالىقتارىمىزدىڭ يگىلىگى ءۇشىن ەكى ەلدىڭ پارلامەنتتەرى اراسىندا كونسترۋكتيۆتى جانە ىسكەرلىك بايلانىستار جولعا قويىلعانىنا نازار اۋداردى.
كەزدەسۋدە ساۋدا-ەكونوميكالىق ىقپالداستىقتىڭ, پارلامەنتارالىق ديپلوماتيا مەن سۋ سالاسىنداعى بايلانىستى ارتتىرۋدىڭ وزەكتى ماسەلەلەرى تالقىلاندى. سونىمەن قاتار ەكىجاقتى قارىم-قاتىناس دوستىق جانە ءوزارا قولداۋ رۋحىندا دامىپ كەلە جاتقانى ايتىلدى.
مەملەكەت باسشىسى ەكىجاقتى ستراتەگيالىق سەرىكتەستىكتى نىعايتۋعا ولشەۋسىز ۇلەس قوسقانى ءۇشىن رۋستامي ەموماليدى ءىى دارەجەلى «دوستىق» وردەنىمەن ماراپاتتادى.