ەنەرگەتيكا مينيسترلىگىنىڭ مالىمەتىنشە, الداعى جىلىتۋ ماۋسىمىنا قاجەتتى كومىر قورى جەتكىلىكتى. مينيستر ەرلان اقكەنجەنوۆ ۇكىمەت وتىرىسىندا كومىر ءوندىرۋشى كاسىپورىندار مەن «قازاقستان تەمىر جولى» وڭىرلەرگە جوسپارداعى كولەمدى تاسىمالداۋعا تولىق دايىن ەكەنىن ايتتى, دەپ جازادى Egemen.kz.
بيىلعى جەتى ايدا ەلىمىزدە 61,4 ميلليون توننا كومىر وندىرىلگەن. ونىڭ ىشىندە كوممۋنالدىق-تۇرمىستىق قاجەتتىلىك پەن حالىققا – 2,2 ملن توننا, ەنەرگەتيكالىق كەشەندەرگە – 37,4 ملن توننا, ونەركاسىپتىك كاسىپورىندارعا – 1,6 ملن توننا, ال ەكسپورتقا – 18,2 ملن توننا جونەلتىلدى.
جالپى, الداعى قىستا ەلىمىزگە 7,7 ميلليون توننا كومىر قاجەت. قازىردىڭ وزىندە 2,2 ميلليون توننا جەتكىزىلىپ ۇلگەردى, بۇل جىلدىق جوسپاردىڭ شامامەن ۇشتەن ءبىرى. اكىمدىكتەردىڭ دەرەگىنشە, كومىر ساتۋ ورىندارىنداعى قور 434 مىڭ تونناعا جەتكەن.
ءمينيستردىڭ ايتۋىنشا, كومىر وندىرۋشىلەر مەن تەمىرجولشىلار كەستەگە ساي جۇمىس ىستەپ جاتىر. سوندىقتان بيىلعى قىس مەزگىلىندە وڭىرلەردى كومىرمەن قامتۋدا ماسەلە تۋىندامايدى دەپ سەندىردى.